По веста за апсењето на сопственикот и извршен директор на Телеграм, Павел Дуров. во понеделникот на аеродромот во Париз, се огласи и францускиот претседател Емануел Макрон.
Макрон изјави дека апсењето на Дуров не е политички мотивиран потег, туку дел од независна истрага.
Француските медиуми објавија дека Дуров бил приведен на аеродромот во Париз во саботата, врз основа на налог за апсење во кој се тврди дека неговата платформа се користела за перење пари, трговија со дрога и други злосторства.
Во своето прво јавно обраќање за апсењето, Макрон на мрежата Х објави дека Франција е „длабоко посветена на слободата на изразувањето“, но дека „слободите мора да се почитуваат во рамките на законот, и на социјалните мрежи и во реалниот живот, за да се заштитат граѓаните и да се почитуваат нивните основни права“.
Остро осудувајќи ги, како што рече, лажните информации за апсењето на Павел Дуров, Макрон изјави дека тоа „во никој случај не е политички мотивирана одлука“.
Руските владини претставници изразија бес поради апсењето на сопственикот на Телеграм, а некои го нарекоа апсењето политички мотивиран потег, алудирајќи на двојните стандарди на Западот за слободата на говорот.
Телеграм во соопштението наведе дека е во согласност со законите на ЕУ, вклучувајќи го и Законот за дигитални услуги, и дека неговата корисничка политика „е во согласност со стандардите и постојано се подобрува“.
„Апсурдно е да се тврди дека платформата или нејзиниот сопственик се одговорни за злоупотребата на таа платформа“, се наведува во соопштението на Телеграм. „Речиси милијарда корисници во светот го користат Телеграм како средство за комуникација и како извор на клучни информации. Очекуваме брзо решение за оваа ситуација“, додаваат тие.
.webp){kind=icon}
