Налог за апсење на опозицискиот лидер во Венецуела

Венецуелски судија издаде налог за апсење на опозицискиот кандидат за претседател Едмундо Гонзалес, под обвиненија што вклучуваат узурпација на власта, поттикнување на бунт, заговор и саботажа, пренесуваaт светските агенции.

Налогот е издаден од судија што води случаи поврзани со тероризам, по барање од обвинителството. Овој потег следува по немирите предизвикани од оспорените претседателски избори во Венецуела.

Претходно, венецуелското обвинителство објави дека против Едмундо Гонзалес и опозициската лидерка Марија Корина Мачадо се водат истраги по обвиненија за узурпација на службена позиција и поттикнување на бунт.

Централната изборна комисија, лојална на владата, го прогласи Николас Мадуро, кој е на власт од 2013 година, за победник на претседателските избори на 28 јули. Сепак, комисијата сѐ уште не ги објавила деталните резултати.

Опозицијата ја обвинува владата за изборни измами и тврди дека Гонзалес ги добил изборите.

Неколку држави, меѓу кои САД, Перу, Аргентина, Еквадор, Панама, Уругвај и Костарика, го признаа Гонзалес како вистинскиот победник, укажувајќи на изборни измами. ЕУ и Организацијата на американските држави исто така ги доведоа во прашање изборните резултати. 

Во меѓувреме властите во САД го конфискуваа авионот на Мадуро што се наоѓал на сервисирање во Доминиканска Република и синоќа го однеле во Флорида. Министерството за трговија испрати соопштение по овој повод во кое се тврди дека авионот „дасалт фалкон“ (Dassault Falcon 900EX,) што Мадуро го користел за официјални патувања бил незаконски набавен преку лажна компанија и тајно извезен од САД.

Во соопштението се наведува дека сето тоа било во спротивност со санкциите и законите за контрола на извозот.

„Ова задржување нека послужи како јасен сигнал: авионите незаконски набавени во САД за интересите на венецуелските функционери што се под санкции не можат едноставно да полетуваат на зајдисонце“, изјави Метју Акселрод, помошник-министер за спроведување извозни правила во Министерството за трговија.

Во моментов нема коментари за веста. Биди прв да коментира...

Остави коментар