Камала Харис го навлече Трамп на дебата под нејзини услови

Камала Харис својата дебатна стратегија во вторникот вечер ја засноваше на провоцирање на Доналд Трамп пред националната телевизиска публика, ставајќи го противникот во неповолна позиција.

Демократската кандидатка за претседател го принуди својот републикански противник да се брани од своите кривични пресуди, своето богатство и својата улога во укинувањето на федералното право за абортус. Таа го предизвикуваше за ентузијазмот на неговите митинзи и неговата склоност кон бизарни изјави и теории на заговор.

Беа потребни само неколку минути за поранешниот претседател да го прифати нејзиниот пристап, со тоа што Трамп ја пренасочи дискусијата на имиграцијата и безбедноста на границите со непоткрепени онлајн гласини за недокументирани мигранти, за кои рече дека сега ги јадат миленичињата на луѓето во едно предградие на Охајо.

„Луѓето што дојдоа ги јадат мачките. Ги јадат миленичињата на луѓето што живеат таму. И тоа е она што се случува во нашата земја, и тоа е срамота“, рече Трамп, дури и кога еден од модераторите на дебатата, Дејвид Мјур од „Еј-би-си њуз“ (ABC News), забележа дека тврдењата не се вистинити.

Овој момент го отслика недостигот од воздржаност на поранешниот претседател и го дефинира судирот каде што републиканецот повторно и повторно дозволуваше да биде одвлечен од обидите да ја дефинира Харис. Постдебатните анализи и социјалните мрежи се фокусираа на испадите на Трамп, враќајќи го фокусот на основниот аргумент на Харис - дека поранешниот претседател не е способен за функцијата.

Doug Mills/The New York Times

Перформансот претставуваше тактичка грешка за републиканецот, за кого анкетите покажаа дека во последните денови почнал да го намалува избликот на ентузијазам кај демократите по повлекувањето на поранешниот претседател Џо Бајден во полза на Харис.

Знаците дека вечерта не помина добро за Трамп беа многубројни: републиканецот се појави во таканаречената „спин рум“ (spin room) да прогласи победа, но и покрај тоа ги критикуваше модераторите на дебатата како неправедни и сугерираше дека не е склон да учествува во друга дебата. Шансите на Харис за победа на изборите се зголемија на страницата за обложување „Предиктит“ (PredictIt) на 56 отсто, од 53 отсто пред дебатата.

Биткоинот падна за 1,5 отсто пред да го намали падот и да тргува на 56.983 долари во 10:10 часот во вторникот во Њујорк. Американските фјучерси и индексот на доларот се намалија, додека државните обврзници останаа стабилни. Дури и поп-ѕвездата Тејлор Свифт го искористи моментот за да се вклучи во политичката арена и да ја поддржи демократската кандидатка.

Со оглед на агресивноста и агилноста на Харис на сцената како поранешна обвинителка, таа постојано успеваше да ја насочи дебатата за да ги истакне однесувањето на Трамп и неговото досие, наместо да се фокусира на сопствената сè уште нецелосно формирана политичка агенда. Тоа беше ноќ во која стилот ја надмина суштината; дебатата повеќе се водеше под нејзини услови отколку негови, а потоа таа го предизвика Трамп на втора дебата.

Дури и во моменти кога Трамп требаше да има предност, како на прашањата за економијата или повлекувањето на САД од Авганистан, Харис успеа да го испровоцира доволно за неговите напади врз неа да не постигнат целосен ефект. Во исто време нејзиниот често ироничен израз на лицето покажа дека одбива да го сфати сериозно како нејзините претходни противници.

„Тој ја прифати мамката и тоа беше очигледно во сè понепријателскиот јазик што го користеше за да ги опише луѓето што ги мрази“, рече долгогодишниот републикански анкетар Френк Лунц по дебатата.

Харис се потпре на улогата на обвинител речиси од самиот почеток, обликувајќи ја дебатата со почетните забелешки што потсетуваа на воведно излагање во судница.

„Ќе ви кажам на сите во оваа дебата вечерва, ќе слушнете од истиот стар учебник“, рече таа. „Куп лаги, незадоволства и навреди. Она што ќе го слушнете вечерва е детална и опасна програма наречена 'Проект 2025', која поранешниот претседател има намера да ја спроведе доколку повторно биде избран“.

Во текот на целата дебата, таа потоа ги побиваше, негираше и ги преформулираше тврдењата на Трамп и постојано се навраќаше на своето воведно излагање. „Уште еднаш, на почетокот од оваа дебата реков дека ќе слушнете куп лаги од овој човек и тоа е уште една од нив“, рече Харис, осврнувајќи се на лажното тврдење на Трамп дека таа преговарала со Владимир Путин за војната во Украина.

Вечерта започна со прашање за економијата - поволна територија за Трамп, кој задржува предност по ова прашање во анкетите во клучните држави. Трамп ја претстави својата визија за намалување на даноците и царините, додека Харис зборуваше за нејзиниот план за проширување на даночниот кредит за деца и помош за купувачите на домови по првпат со аванс за плаќање. Трамп се обиде да ја поврзе Харис со економскиот ефект на Бајден, особено по прашањето на инфлацијата, и ја нарече марксистка.

„Јас воведов тарифи, но немав инфлација“, изјави Трамп. „Погледнете, имаме ужасна економија поради инфлацијата - која навистина е позната како уништувач на држави, таа ги уништува земјите - имаме инфлација каква што многу малку луѓе виделе досега“.

Bloomberg Mercury

Сепак, Харис брзо си го најде местото во делот од дебатата за абортусот и репродуктивните права, при што зборуваше со силни и впечатливи термини.

„Зборував со жени низ нашата земја. Сакате да зборувате за ‘ова е она што луѓето го сакаа’? Бремени жени што сакаат да ја изнесат бременоста докрај, кои страдаат од спонтан абортус и им се одбива медицинска нега во итна состојба бидејќи здравствените работници се плашат дека може да одат во затвор, а таа крвави во автомобил на паркингот? Таа не го сакаше тоа. Нејзиниот сопруг не го сакаше тоа. Дванаесет или тринаесетгодишна жртва на инцест, која е принудена да ја носи бременоста докрај, тие не го сакаа тоа“, рече Харис.

Трамп, за разлика од Харис, понуди несистематски одговор, тврдејќи дека не сака да го забрани абортусот, но одбивајќи да се обврзе дека ќе стави вето на закон што би вовел федерални ограничувања за абортус. Тој доби уште еден „факт чек“ од модераторите кога погрешно тврдеше дека демократите поддржуваат убивање деца по нивното раѓање.

Харис во прашалник на Американската унија за граѓански слободи за време на нејзината кампања во 2020 година изјави дека ќе поддржи операции за промена на полот, финансирани од даночните обврзници, за задржани мигранти и федерални затвореници. Но обидот на Трамп да го потенцира овој минат коментар наиде на потсмев на социјалните мрежи.

Bloomberg Mercury

„Сега таа сака да врши трансродови операции на илегални странци што се во затвор“, рече Трамп.

Жалбите на Трамп дека модераторите биле неправедни се темелеа, барем делумно, на фактот дека тие повеќепати го притискаа - и потоа ги проверуваа неговите чести и невистинити тврдења за неговите постапки за време на бунтот на 6 јануари 2021 година во Капитол и за резултатите од претходните избори.

Еден од предизвиците на поранешниот претседател во последната фаза од кампањата е проширувањето на неговата база на поддржувачи надвор од републиканските гласачи. Но неговото избувнување за мигрантите, кои наводно јадат миленичиња, можеби ќе биде разбрано само од гласачите запознаени со онлајн мемиња - оставајќи ги збунети оние што дури сега се вклучуваат во претседателската трка.

Тоа е предизвикот за Харис и Трамп - да му се обратат на ова мало делче неопределени Американци и да се прикажат себеси како патот напред за земјата.

Стратегијата на Харис беше јасна во вторникот вечер, со нејзините обиди да се оддалечи од слабостите во врска со имиграцијата, економијата и критиките дека сè уште нема целосно разработено свој политички план.

Поранешниот претседател, кој се фалеше дека не се подготвувал за дебатата, изгледаше помалку подготвено - вклучувајќи и кога беше прашан дали има план за замена на Законот за достапна нега.

„Имам концепти за план“, рече Трамп.

Во моментов нема коментари за веста. Биди прв да коментира...

Остави коментар