Израелските сили го елиминираа лидерот на Хамас во Либан

Лидерот на Хамас во Либан, Фатех Шериф Абу ел Амин, загина заедно со неколку члена на семејството при израелски напад врз јужниот дел на земјата. Според информациите, при нападите врз палестински бегалски камп во Тир, покрај Абу ел Амин загинале и неговата сопруга, ќерка и син.

Соопштението на Хамас за смртта на Амин следуваше откако палестинската милитантна група Народен фронт за ослободување на Палестина (ПФЛП) утрово соопшти дека тројца нејзини членови се убиени при израелски напад врз центарот на Бејрут.

Според тоа соопштение, во израелскиот напад загинале членот на политичкото биро и шеф на воено-безбедносниот оддел Мохамед Абед Ал-Ал и членовите на воениот оддел и воената команда во Либан Имад Одех и Абдул Рахман Абед Ал-Ал.

Ова е прв напад врз центарот на Бејрут од војната во 2006 година. 

Според либанското министерство за здравство, во израелските напади загинале повеќе од 100 луѓе, додека бројот на жртвите во изминатите две недели се искачи над 1.000, а околу 600 се повредени.

Претходно, привремениот либански премиер Најиб Микати изјави дека израелските воздушни напади принудиле еден милион луѓе да ги напуштат домовите.

„Тоа е најголемо раселување што може да се случи“, посочи Микати.

Според израелските медиуми, нападите врз Либан не само што ќе продолжат туку ИДФ се подготвува и за копнена операција. Неименуван безбедносен извор изјави дека иако сè уште не е донесена политичка одлука, ИДФ привршува „значајни операции“ како подготовка за копнена инвазија врз јужен Либан.

„Целта на копнените маневри е да се уништат целите, но и да се проектира моќта на Израел и ИДФ на Блиски Исток, особено врз Хезболах“, истакна тој.

И додека ИДФ напаѓа цели на либанската милиција, Хезболах во Либан и на Хутите во Јемен, расте стравот дека конфликтот на Блискиот Исток може да излезе од контрола и да се вклучат Иран и САД.

САД повикаа на дипломатско решение на конфликтот во Либан, но дозволија и засилување за својата армија во регионот.

Во моментов нема коментари за веста. Биди прв да коментира...

Остави коментар