Намалената побарувачка веќе втора недела по ред ја турка цената на струјата надолу на берзата која е клучна за македонските компании. На унгарската берза Хупекс (Hupx) од каде по берзански цени домашните фирми најмногу набавуваат струја, еден мегаватчас испорачан завчера чинеше 106 евра, што е за 44 проценти помалку од минатиот понеделник односно од стартот на претходната недела. Ако се анализира цената на струјата на Хупекс од 23 септемеври и овој 23 октомври падот на цената е над 72 отсто. Тогаш мегаватчас изнесуваше 386 евра.
Сепак, и покрај сегашните ниски цени, пазарот не мирува и неизвесноста продолжува. Цената на струјата на HUPX бележи силни осцилации на дневно ниво. Па така, за денеска цената на берзата е над 77 отсто повисока од вчера и се тргува по 189 евра за мегават час.
Цената на струјата е клучниот проблем за домашните компании кои енергентот го набавуваат на слободниот пазар. Додека фирмите и коморите бараат решенија и помош од државата, дел од нив ставија клуч на врата. Сепак, поевтинувањето на берзанската цена на струјата донесе позитивно раздвижување. Од утре, како што веќе е највено, со работа повторно почнуваат радовишките рудници „Бучим” ДОО и „Боров Дол” ДООЕЛ. Оттаму известија дека по двомесечно затворање планираат рестартирање на производството и тоа во целосен капацитет.
„Во изминатите десетина дена, видовме промена на цената на електричната енергија што ни овозможи повторно да ги започнеме производствените активностите со надеж дека тенденцијата ќе продолжи и цената на регионалната берза за електрична енергија (HUPEX) ќе се стабилизира. Во текот на овие денови ќе бидат повикани на редовна работа сите вработени во рудниците, за подготовка и отпочнување на производството. Во меѓувреме, продолжуваме со реализација на веќе започнатите капитални инвестициски проекти и сме оптимисти во врска со динамиката со која се одвиваат работите, изјави Олег Чусовитин, генерален директор на Бучим.
Блумберг Адриа веќе пишуваше за катастрофалната состојба која на македонските фирми им ја предизвика скапата струја. Затворен е и поранешен „Фени“, сегашен „Еуроникел Индустри“ од Кавадарци, а за него дознавме дека веќе се водат преговори за смена на сопственоста. Имено, наши извори тврдеа дека голема компанија покажува интерес за преземање на дел од кавадаречкиот гигант.
И покрај позитивната вест за радовишките рудници од Стопанската комора за Блумберг Адриа изјавија дека Владата треба да се ангажира затоа што не смее да не залажува моменталната цена на струјата на берзите бидејќи ниедна од причините за нејзин раст во иднина не е елиминирана.
„Компаниите се обезбедени за до крајот на годината. Но, за потоа владее воздржаност и неизвесност. Не може да се прават планови за идниот период без поддршка од државата која не мора да е финансиска, туку може да биде во различни облици“, вели Јелисавета Георгиевска Јовевска, потпретседателка на Стопанската комора на Македонија, за Блумберг Адриа.
Инаку во рудниците во Радовиш работат околу 700 луѓе и тие ќе бидат вратени на работа.
Неодамна министерот за економија, Крешник Бектеши, рече дека до крајот на овој месец ќе биде подготвен и објавен пакетот мерки за поддршка на стопанството. Досега се знае само дека компаниите од прехранбениот сектор ќе добијат пониска цена од 01 декември. Сите останати мерки се во подготовка.
„Од 1 декември фиксна цена на електрична енергија ќе има за 150 компании за млечни производи, млеко, леб и други прехранбени производи. Цената ќе биде најконкурентна и ќе биде уште пониска од таа за малите потрошувачи. Министерството за економија работи на пакетот. Кога ќе биде готов ќе го доставиме до Владата и јавноста ќе ги дознае деталите. Овој пакет мерки се подготвува во соработка со коморите и сите засегнати“, рече Бектеши.
.webp){kind=icon}
