Според досегашниот тренд на раст на трошоците за живот, како и растот на просечната плата, се очекува дека минималната плата во март ќе изнесува околу 20.500 денари, вели Павле Гацов, даночен експерт во „Проагенс“.
„Со законот е пропишано секој март минималната плата да ја усогласуваме со порастот на трошоците на животот и порастот на платите и, според денешните проценти на пораст, се очекува минималната плата да порасне некаде околу 14 проценти. Тоа би значело дека минималната плата во март би била приближно 20.500 денари, ако се задржи овој тренд во следните два месеца“, вели Гацов во разговор за Блумберг Адрија ТВ.
Иако не се знае дали и како компаниите ќе го следат растот на минималната плата кога станува збор за усогласување на другите плати, Гацов сепак смета дека дури и да не сакаат работодавците, растот на минималната плата ќе ги поттикне и другите плати нагоре.
Гацов смета дека платите во секој случај мора да го следат растот на цените.
„Македонија не може да се пофали дека добро се бореше со растот на цените. На некој начин го одбранивме фиксниот курс, но затоа цените отидоа до плафон. Особено се погодени тие набавки што се од животна важност за граѓаните на Македонија, со оглед на тоа дека нашата земја е посиромашна, со помал доход и најголем дел од примањата трошиме за секојдневните потреби, а тука растот е доста силен. Но не е најважно само да се мери растот на цените, мора да се споредува и со растот на платите. Платите многу побавно растат од цените и затоа ситуацијата на македонските граѓани се влоши во 2022 година“, образложува Гацов.
Тој зборува и за најавениот данок на екстра-профит, а целиот разговор со даночниот експерт Павле Гацов погледнете го во видеото.
.webp){kind=icon}
