text size
Српскиот министер за градежништво, транспорт и инфраструктура Горан Весиќ најави заедничка товарна железничка станица на Србија и Северна Македонија во Табановце, јави дописникот на МИА од Белград.
„Ќе имаме заедничка товарна железничка станица, така што возовите повеќе нема да застануваат на граница, туку прегледот ќе се врши во Табановце. Кон средината на мај во Бијело Поље ќе отвориме заедничка железничка станица со Црна Гора, така што возовите повеќе нема да застануваат на границата туку во Бијело Поље, каде што ќе имаме царина и полиција, и српска и црногорска, и сè ќе биде на едно место“, изјави Весиќ за белградски „Јуроњуз“.
Тој додаде дека вакво нешто Србија ќе има и со Унгарија, во Сегедин, каде што ќе се вршат царината и пасошката контрола и оттаму возовите без застанување ќе влегуваат на територијата на Србија.
Весиќ изјави и дека брзата пруга меѓу Белград и Будимпешта ќе биде завршена во 2025 година и додаде дека српскиот дел од пругата ќе буде завршен до 2024 година.
Меѓу другото, тој изјави и дека очекува од јули Србија да има интегрирана наплата на патарина со Северна Македонија, а наскоро и со Хрватска.
„Тоа значи дека доколку користите електронска наплата на патарина, ќе треба таг-уредот да го врзете со платежна картичка и ќе можете целосно слободно да поминувате низ Северна Македонија со српски таг што ќе работи на секоја патарина, а патарината ќе се наплаќа од платежната картичка и нема да има повеќе застанување“, објасни Весиќ и додаде дека оние што имаат таг од Северна Македонија ќе можат да патуваат низ Србија на ист начин.
Весиќ кажа дека за ова се водат преговори и со Хрватска, ќе биде вклучена и Албанија, а се разговара и со Грција.
.webp){kind=icon}
