Високите температури ја зголемија потрошувачката на електрична енергија во земјава. Од „ЕВН хоум“ информираат дека во текот на вчерашниот ден е регистрирана најголема потрошувачка на електрична енергија, која изнесувала 16.015 мегават-часа (MWh), со оглед на измерените температури од минимални 21 Целзиусов степен и максимални 38 Целзиусови степени во скопски Аеродром. Од 17 јуни до 17 јули се потрошени 405.028 мегават-часа, велат од „ЕВН хоум“.
Како најголемо консумно подрачје, овој тренд го следи скопскиот регион, кој за овој период има вкупна потрошувачка од 148.399 мегават-часа, или во просек 4.787 мегават-часа дневна потрошувачка. Но за време на вчерашниот ден скопјани потрошиле 6.070 мегават-часа електрична енергија.
Според податоците на ЕВН, најголема потрошувачка на струја во летните денови имало во понеделникот, на 17 јули, споредено со претходните две години. Во 2022 година најголема потрошувачка на струја имало во среда, на 27 јули, кога биле потрошени 15.231 мегават електрична енергија. Додека во летото 2021 година најмногу струја била потрошена на 29 јуни, 15.956 мегават-часа.
Споредено со истиот период во претходната година, потрошувачката на електрична енергија била поголема за разлика од годинава. Според ЕВН, од 17 јуни до 17 јули 2022 година се потрошени 412.272 мегават-часа, а просечната дневна потрошувачка за тој период е 13.590 мегават-часа. „Разликата се јавува поради разликата на температурите, а оваа година во овој период имаме значително пониски температури во јуни и повисоки температури во јули во однос на истиот период минатата година“, информираат од ЕВН.
.webp){kind=icon}
