Во технолошките индустриски развојни зони Струмица и Струга ќе се градат две фотонапонски централи со вкупна моќност од близу 8 MW. Двете централи ќе се градат во рамките на јавно приватно партнерство со турската компанија „Фидес електрик енерџи“, која е избрана на јавен повик.
Јавниот повик беше отворен на крајот на ноември 2023 година, во постапка во согласност со Законот за јавни набавки, во траење од 45 дена, под исти услови за домашни и странски компании, информираат од ТИРЗ.
Во рамките на повикот биле доставени две понуди, една од избраната компанија, како и една од израелско-кинески конзорциум. Турската компанија ќе треба да изгради фотонапонски електроцентрали во двете зони со вкупна моќност од близу 8 MW. Во согласност со доставената понуда и спроведената аукција, 10 проценти од приходите остварени од производството на електричната енергија компанијата е обврзана да ги уплаќа во државниот буџет.
Договорот за јавно приватно партнерство се склучува на 25 години. По истекот на тој период, приватниот партнер е обврзан сопственоста на фотонапонските централи да ѝ ја пренесе на државата, со 80 проценти производствен капацитет. Земјиштето останува сопственост на државата. Приватниот партнер ќе плаќа и годишна такса за земјиштето (наем) од 40 денари за квадратен метар.
„Со овие инвестиции, ТИРЗ има цел да придонесе кон зајакнување на енергетските капацитети на државата, како и за забрзување на транзицијата кон економија базирана на зелена енергија што е глобален тренд. Токму пристапот до енергија од обновливи извори е барање односно приоритет за повеќето од странските компании што работат односно имаат интерес да инвестираат во С. Македонија. Со фотонапонските централи директно се придонесува кон зголемување на атрактивноста за инвестирање во земјата“, посочуваат од ТИРЗ.
До крајот на месецов ќе биде објавен и нов повик за јавно приватно партнерство за изградба на фотонапонски централи, цел за која се определени над 40 хектари земјиште во ТИРЗ Скопје, Штип и Прилеп.
Станува збор за земјиште што не е погодно за вршење друга дејност (индустрија) односно гранични парцели што се неискористени над 15 години, а кои со оваа постапка ќе се стават во функција и ќе ѝ носат значителни приходи на државата. Јавниот повик ќе биде под исти услови како оној за ТИРЗ Струга и Струмица, еднакво отворен за домашни и странски компании.
.webp){kind=icon}
Во моментов нема коментари за веста. Биди прв да коментира...