.webp){kind=icon}
Владата донесе одлука за ограничување на маржата за училишниот прибор, и тоа на 5 отсто за големопродажба и 10 отсто за малопродажба, информира премиерот Христијан Мицкоски.
Како што истакна тој на денешната прес-конференција, ограничувањето на маржата е во рамките на кампањата „Помалку трошоци, повеќе за тебе! Се грижиме“, а одлуката е донесена на денешната владина седница.
„Анализиравме увозни царински декларации и цени во малопродажба и заклучивме дека многу производи се продаваат по двојно повисоки цени од увозните. На пример, маркер се набавува по 60,1 денари, а се продава по 130 денари, набавната цена на јаглен е 68,6 денари, додека продажната 200 денари... Со оваа мерка на половина би се намалил трошокот што го имаат граѓаните со почетокот на учебната година“, рече Мицкоски.
Тој најави дека и понатаму ќе има ограничувања на маржите и профитот на поединци, кои, како што кажа, генерираат профити и со тоа ја зголемуваат инфлацијата.
Прашан дали носењето на оваа мерка требаше да се направи порано, премиерот рече дека нејзиното носење не е задоцнето и додаде дека ќе следуваат мерки за заштита на есенската и зимската кошничка.
