Единствената компанија што достави понуда на тендерот на Агенцијата за електронски комуникации (АЕК) за доделување одобрение за нов мрежен оператор е „Оне Македонија телекомуникации“, фирма на унгарската компанија „Фор ај-џи“ (4iG).
На денешното отворање на понудите, Комисијата за спроведување на тендерот констатира дека компанијата ги доставила сите потребни документи. „Постапката ќе продолжи во согласност со законот. Следува евалуација на документацијата и изработка на извештај“, изјави Игор Бојаџиев, претседател на комисијата.
Бидејќи се распишани локалните избори, конечната одлука ќе биде донесена по завршувањето на изборниот процес. Инаку, тендерска документација за трет мобилен оператор подигнале три компании. Според условите од тендерот, потенцијалниот нов оператор треба да започне со работа на крајот на 2026 година.
Експертите од телекомуникациската област оценуваат дека доколку се заокружи постапката и во Македонија се појави нов мрежен оператор покрај „Македонски телеком“ и „А1 Македонија“, неговата цел ќе биде да преземе дел од пазарот и да навлезе со сервиси што моментално се помалку достапни. Клучно ќе биде да се обезбеди оптимален баланс меѓу трошоците за изградба на инфраструктура, квалитетот на сервисите и цените.
Влезот на новиот оператор е во услови кога од услугите на телекомуникацискиот пазар најниско задоволство има од цените на мобилната телефонија, со 55,9 проценти.
Заклучно со првиот квартал од годинава, во земјава се регистрирани 1.941.996 активни претплатници во мобилната телефонија. Уделот на операторите е следен: 47,69 отсто има „А1 Македонија“, 46,66 отсто држи „Македонски телеком“, 3,38 отсто М-ТЕЛ (виртуелен мобилен оператор што влезе на пазарот во октомври 2022 година), 1,34 отсто „Телекабел“, 0,38 отсто „Мтелмобајл“ и 0,10 отсто „Грин мобиле“.
.webp){kind=icon}
