Банкарите од ФЕД се согласни за ново зголемување на каматните стапки

Претставниците на Федералните резерви (ФЕД) ја истакнаа потребата да се продолжи со зголемување на каматните стапки.

Претседателката на Федералните резерви од Канзас Сити, Естер Џорџ, е домаќинка на годишната средба на банкарите од американските централни банки. Во своето излагање таа рече дека централната банка уште не ја зголемила каматната стапка на соодветното ниво според движењето на економијата во моментов и можеби ќе мора да се донесе одлука каматната стапка дури и да надмине 4 отсто за извесен период.

„Многу е важно дека во нашите разговори сме сложни и сме на чисто за правецот во кој се движиме“, рече таа во интервју за Блумберг ТВ.

„Мора да ги зголемиме каматните стапки за да ја забавиме побарувачката и да ја зауздаме инфлацијата во рамките што ни се поставени како цел“, рече Естер Џорџ.

Во тек е дводневниот самит на централните банкари, а се очекува утре претседателот на ФЕД, Џерем Пауел, во рамки на својот говор да ја повтори неговата одлучност за продолжување со заострувањето на монетарната политика во борбата против инфлацијата.

Американската централна банка забрзано ја зголемува каматната стапка со цел да ги скроти најбрзорастечките цени во последните 40 години.

Претставниците на ФЕД ја зголемуваа каматната стапка за 75 базни поени на секој од последните два состаноци и најавија дека истото би можело да се повтори во зависност од податоците.

ФЕД во јуни ја покачи каматната стапка на 2,5 проценти. Меѓутоа, во записникот од состанокот на претставниците на ФЕД минатиот месец е нотирано дека се размислува за краткорочно зголемување на каматната стапка над тоа ниво.

 

 

Во моментов нема коментари за веста. Биди прв да коментира...

Остави коментар