„Енвидија“ пред тест - потврда на еуфоријата или будење стравови

Акциите на производителите на чипови поголемиот дел од годината го туркаа пазарот нагоре. Сега резултатите на компанијата „Енвидија“ (Nvidia) имаат шанса или да го потврдат продолжувањето на тој раст или дополнително да ја зголемат загриженоста на инвеститорите.

Лидерот во областа на полупроводници за вештачка интелигенција (ВИ) ќе ги објави резултатите по затворањето на пазарот в среда. Волстрит очекува уште еден во низата силни извештаи од производителот на чипови, додека технолошките гиганти продолжуваат да вложуваат огромни суми пари во изградба на ВИ-инфраструктура. Затоа инвеститорите внимателно ќе бараат сигнали за тоа какви се изгледите за понатамошен раст.

„Резултатите или прогнозите на ’Енвидија’, како и коментарите за време на конференцискиот повик, можат да им дадат на инвеститорите повеќе доверба дека овој ВИ-инвестициски циклус ќе продолжи не само во еден квартал или во 2026, туку и во 2027, 2028 година и понатаму“, рече Џоан Фини, портфолио-менаџерка во „Адвајзорс капитал“ (Advisors Capital). „Тоа би било смирувачко за пазарот“, додаде таа.

Од друга страна, разочарувачки резултати би можеле да ги потврдат стравувањата на инвеститорите дека секторот премногу пораснал. Индексот Philadelphia Semiconductor порасна 60 отсто оваа година, но падна 6,4 отсто во петокот и понеделникот поради загриженоста околу инфлацијата. Акциите на „Енвидија“ пораснаа 18 отсто од почетокот на 2026 година и 34 отсто од најниското ниво кон крајот на март, но изгубија 6,4 отсто во последните три трговски сесии. Сепак, тие сè уште го надминуваат технолошкиот индекс Nasdaq 100, кој оваа година порасна 14 отсто.

„’Енвидија’, за жал, создаде очекување дека секој квартал ќе ги надминува прогнозите и ќе ги зголемува очекувањата. Ако не се случи тоа, пазарот ќе биде разочаран“, посочува Фини.

И покрај релативно послабиот ефект во 2026 година, „Енвидија“ останува најголемата компанија на пазарот и е одговорна за речиси петтина од вкупниот раст на индексот S&P 500 од 7,4 отсто оваа година. Уште четири производители на чипови - „Микрон“ (Micron Technology), „Бродком“ (Broadcom), АМД (Advanced Micro Devices) и „Интел“ (Intel) - се меѓу седумте најголеми поединечни двигатели на растот на S&P 500 во 2026 година, што е ретко видено ниво на доминација за оваа циклична индустрија.

Инвеститорите имаат многу причини за оптимизам во економијата преплавена со инвестиции во вештачка интелигенција. Четирите најголеми инвеститори - „Амазон“ (Amazon), „Алфабет“ (Alphabet), „Мајкрософт“ (Microsoft) и „Мета“ (Meta Platforms) - годинава планираат капитални инвестиции до 725 милијарди долари, со уште поголеми вложувања во 2027 година. Чиповите сочинуваат голем дел од тие трошоци, а „Енвидија“ и понатаму има доминантен пазарен удел во ВИ-акцелераторите.

Растот доаѓа толку брзо што акцијата почнува да изгледа евтино. Консензуалните процени за нето-профитот на „Енвидија“ во фискалната 2027 година, која завршува во јануари, пораснаа 13 отсто во последните три месеци, додека процените за приходи се зголемија 12 отсто, покажуваат податоците на „Блумберг“. Како резултат на растот на очекувањата, акциите сега се тргуваат по множител помал од 24 пати од очекуваната заработка, значително под десетгодишниот просек од околу 36.

„Вреднувањето е секундарно во однос на фундаменталната приказна за раст, која останува главен двигател, но процените не се на ниво што предизвикува непријатност“, рече Џефри Блажек. Според него, вреднувањето на „Енвидија“ „дава чувство на сигурност дека не сме во балон во однос на профитот или паричните текови“.

Bloomberg

Оваа сезона на објави на резултати ја обележија низа исклучително силни извештаи од производителите на чипови. „Интел“, АМД, „Тексас инструментс“ (Texas Instruments), НХП (NXP Semiconductors NV) и СМТ (Silicon Motion Technology) забележаа двоцифрени скокови на акциите по објавата на резултатите. Досега 93 отсто од производителите на чипови ги надминаа очекувањата на аналитичарите, со просечно позитивно изненадување од речиси 25 отсто, во споредба со 6,6 отсто во претходниот квартал, според податоците на „Блумберг“.

Сепак, без разлика какви резултати ќе објави „Енвидија“, можеби ќе биде тешко акцијата да направи сличен скок. Пред сè, компанијата е многу поголема од конкуренцијата, па инвеститорите треба да бидат значително поентузијастични за цената да се помести силно. Исто така, „Енвидија“ се соочува со растечка конкуренција од ривали како АМД, додека големите клиенти како „Алфабет“ и „Амазон“ сè подобро ги развиваат сопствените чипови.

Тоа делумно објаснува зошто „Енвидија“ веќе не е најуспешна акција на пазарот. Таа титула сега ја носат компании што произведуваат мемориски чипови и уреди за складирање, како „Сандиск“ (Sandisk), „Сигејт“ (Seagate Technology Holdings) и „Микрон“.

„Верувале или не, оваа приказна сега дејствува помалку атрактивно и помалку возбудливо од некои други што се на пазарот“, рече Томас Мартин, виш портфолио-менаџер во „Глобал инвестментс“, додавајќи дека, притоа, „станува збор за гигантска компанија“.

Иако сè уште се очекува силен раст, прогнозите укажуваат на забавување во наредните години, што дополнително би можело да го ограничи растот на акцијата. Се очекува „Енвидија“ да оствари раст на приходите од околу 72 отсто во фискалната 2027 и 34 отсто во 2028 година, со понатамошно забавување потоа.

„Приказната сега е повеќе насочена кон тоа колку долго растот може да трае, а не толку кон еден квартал“, рече Невил Џевери, портфолио-менаџер и шеф на тимот за емпириски долгорочен капитал во АГИ (Allspring Global Investments), кој исто така поседува акции на „Енвидија“. Тој додаде дека внимателно ќе ги следи сите детали за продажбата на чиповите „блеквел“ (Blackwell) и идната побарувачка за новата линија на производи „рубин“ (Rubin).

Bloomberg

Секако, дури и силен извештај не гарантира раст на акциите на „Енвидија“. Акциите паднаа ден по објавата на последните три квартални резултати, и покрај добрите бројки. Пазарот на опции очекува движење на акцијата од 5,5 отсто во кој било правец по објавата на резултатите. Врз основа на просечната целна цена на аналитичарите, Волстрит очекува раст на акцијата од 26 отсто во следните 12 месеци.

„Ако ’Енвидија’ може да покаже дека нејзините најнови чипови имаат многу силна побарувачка и дека потенцијалниот пазар е поголем отколку што инвеститорите мислат, бидејќи растот ќе трае подолго - тоа значително ќе ја зголеми довербата на инвеститорите во компаниите што го водат ВИ-инвестицискиот бран“, наведува Фини од „Адвајзорс капитал“.