Македонските инвеститори се вртат кон странските берзи: Вложиле 110 милиони евра во 2025.

Македонски резиденти во текот на минатата година преку пет домашни овластени правни лица (четири банки и една брокерска куќа) на странските пазари вложиле 6,7 милијарди денари(околу 110 милиони евра), што е зголемување од 6,97 проценти во однос на претходната година кога на странските пазари бил реализиран промет од 6,3 милијарди денари(околу 102,8 милиони евра), покажуваат податоците на Комисијата за хартии од вредност.

Инвеститорите се повеќе се вртат кон странство

Во вкупно реализираниот промет (домашен пазар и странски пазари од 16,3 милијарди денари односно околу 266 милиони евра) од страна на овластените учесници на годишно ниво во 2025 година на тргување на странски пазари отпаѓаат 41,45 проценти, додека останатите 58,55 проценти (9,5 милијарди денари или околу 155 милиони евра) од вкупно реализираниот промет е на домашниот пазар.

Процентуалниот сооднос на тргување на странските пазари наспрема домашниот пазар (41,45 проценти наспрема 58,55 проценти) е зголемен во однос на 2024 година кога изнесувал 32,13 проценти на странските пазари наспрема 67,87 проценти на домашниот пазар.

Од КХВ информираат дека продолжува трендот на тргување првенство со акции, а тргувањето со обврзници е на релативно исто ниво како и во 2024 година.   

„Шпаркасе банка“ лидер по остварениот промет во странство

Од вкупно реализираниот промет во 2025 година на странските пазари преку „Шпаркасе банка“ АД Скопје реализирани се 42 проценти односно промет од 2,8 милијарди денари (околу 46 милиони евра). На второто место е „Комерцијална банка“, којашто има реализирано промет од 1,9 милијарди денари (31,3 милиони евра) или 28 проценти од вкупно реализираниот промет на странските пазари.

„НЛБ Банка“ АД Скопје има реализирано промет од околу милијарда денари (16,4 милиони евра) или 15 проценти од вкупно реализираниот промет на странските пазари, брокерската куќа „Инвестброкер“ АД Скопје има реализирано промет од 634 милиони денари (10,1 милиони евра), што претставува 9 проценти од вкупниот промет, а „Стопанска банка“ АД Скопје со промет од околу 390 милиони денари (6,3 милиони евра) зафаќа околу 6 проценти од вкупниот промет на странските пазари.    

Пад на прометот на домашниот пазар

Според податоците на КХВ, остварениот промет на домашниот пазар на капитал од 9,58 милијарди денари(155,69 милиони евра) во 2025 година е за 28,46 проценти помал во однос на претходната година.  

„Структурната анализа на прометот одделно по видови хартии од вредност и начин на реализација на трансакциите покажува дека годишниот пад од 28,46 проценти се должи главно на значајното намалување на вредноста на трансакциите со обврзници, како и на намалувањето на прометот остварен преку класично тргување и блок-транскации“, се наведува во извештајот на КХВ.  

 

Оттаму информираат дека вкупниот број на склучени трансакции и количина на истргувани хартии од вредност лани изнесувале 19.616 односно 2.729.433, што во однос на претходната година е намалување за 17,4 проценти односно за 98,73 проценти, соодветно.

Од презентираните финансиски резултати на брокерските куќи во 2025 година може да се види дека три брокерски куќи („Еурохаус“ АД Скопје, „Инвестброкер“ АД Скопје и „Илирика Инвестментс“ АД Скопје) годината ја завршиле со позитивен финансиски резултат, а „Иново брокер“ и „Фершпед брокер“ имале загуба.

Во минатата година се забележува намалување на приходите кај сите брокерски куќи и пад на добивката.