„Спејс екс“ влегува во Nasdaq 100, Волстрит препорачува купување на акцијата

„Спејс екс“ (SpaceX) од вторникот станува дел од индексот Nasdaq 100, додека брокерските куќи на Волстрит почнуваат да ја следат компанијата на Илон Маск за ракети, сателити и вештачка интелигенција со јасен консензус: препораката е купување на акцијата.

Најмалку шест брокерски куќи, меѓу кои „Морган Стенли“ (Morgan Stanley) и „Голдман Сакс“ (Goldman Sachs Group Inc.), почнаа да ја покриваат акцијата со препораки еквивалентни на „купувај“, по истекот на вообичаениот период на молк за аналитичарите од банките што учествуваа во презапишувањето на нејзината првична јавна понуда вредна 86 милијарди долари.

Bloomberg

Аналитичарите се фокусираат на долгорочните изгледи за раст на „Спејс екс“, иако по рекордното деби на берзата и натаму постојат прашања околу профитабилноста, извршувањето на плановите и вреднувањето на компанијата. „Морган Стенли“, еден од најголемите оптимисти, оцени дека компанијата има потенцијал да профитира од побарувачката за услуги поврзани со вештачката интелигенција, поттикната од брзорастечките нови учесници во индустријата.

„Иако договорите со новите даватели на облачни услуги специјализирани за ВИ се главниот двигател на работењето на краток рок, сметаме дека услугите за вештачка интелигенција од почеток до крај се долгорочниот деловен модел“, напишаа аналитичарите на „Морган Стенли“, предводени од Адам Џонас.

Неговиот тим постави целна цена од 300 долари по акција, што подразбира раст од 87 отсто во однос на затворањето во понеделникот, кога акцијата заврши на 160,42 долари.

Во меѓувреме, помалите брокерски куќи имаат поекстремни проценки. „Арете“ (Arete Research) ја постави највисоката целна цена на Волстрит од 401 долар, додека „Њу стрит“ (New Street Research) почна да ја следи компанијата со целна цена од 165 долари, најниска меѓу аналитичарите што ги следи „Блумберг“.

Препораките на аналитичарите се важни затоа што им даваат рамка на инвеститорите за вреднување на „Спејс екс“ како компанија што е повеќе од амбициозен проект на Маск. Сепак, аналитичарите од инвестициските банки вообичаено имаат многу позитивен став кон акциите, а најголемите компании често добиваат најповолни оценки. На пример, иако акциите на „Мајкрософт“ (Microsoft Corp.) паднаа околу 30 отсто од својот максимум, околу 95 отсто од аналитичарите што ја следат компанијата и натаму имаат препорака еквивалентна на „купувај“.

Во групата од 3.000 најголеми американски компании, препораките за купување сочинуваат 63 отсто од сите аналитички оценки, покажуваат податоците на „Блумберг“. Само 4,2 отсто од препораките се за продажба.

Вклучување во индексот

Вклучувањето на „Спејс екс“ во Nasdaq 100 треба значително да ја поддржи акцијата, со оглед на бројот на фондови што го следат овој технолошки индекс.

„Спејс експлорејшн технолоџис“ (Space Exploration Technologies Corp.), официјалното име на компанијата, брзо стана дел од Nasdaq 100 по измените на правилата што ги воведе „Насдак“ (Nasdaq Inc.). Со тие измени, новолистираните компании со голема пазарна капитализација можат да бидат вклучени во Nasdaq 100 по само 15 трговски дена, наместо по претходниот минимален рок од три месеци.

Акцијата стана дел и од индексот Russell 1000 кон крајот на минатиот месец, само две недели по ИПО-то. Аналитичарот на „Блумберг Интелиџенс“, Роб Ду Боф, процени дека вклучувањето на „Спејс екс“ во Nasdaq 100 и  индексите на „ФТСЕ Расел“ (FTSE Russell) ќе поттикне купувања од најмалку 5,4 милијарди долари од фондовите што ги следат индексите.

Побарувачката од пасивните инвеститори можела да биде уште поголема, но „Ес енд Пи Доу Џонс“ (S&P Dow Jones Indices), единица на „Ес енд Пи глобал“ (S&P Global) која управува со индексите, меѓу кои и S&P 500, на почетокот на јуни одлучи да ги задржи постојните критериуми за вклучување. Со тоа беше затворена можноста за брзо вклучување на „Спејс екс“.

„Nasdaq 100 нема ни приближно толку средства што го следат како S&P 500, но има и одредени карактеристики што дополнително ја зголемуваат побарувачката за акциите на ‘Спејс екс’“, изјави Ду Боф.

Според Дејвид Трејнер, главен извршен директор на истражувачката компанија „Њу констрактс“ (New Constructs), моментот на вклучување на „Спејс екс“ во индексот Nasdaq треба да помогне да се намали нестабилноста на акцијата. Сепак, тој предупреди дека инвеститорите треба да бидат внимателни, бидејќи пазарната вредност на компанијата е одвоена од нејзините фундаментални показатели.

Акциите на компанијата, кои паднаа околу 29 отсто од нивниот историски максимум постигнат во текот на тргувањето, беа пониски за околу 1,8 отсто во претпазарното тргување во вторникот, во услови на поширока распродажба на технолошките акции.