Инвеститорите се тркаат да вложат во фондот на ВИ-чудото на Леополд Ашенбренер

Една недела откако хеџ-фондот „Ситуејшнл Ауернес“ (Situational Awareness) на Леополд Ашенбренер речиси доживеа колапс, тој веќе добива барања од инвеститори кои сакаат да вложат дополнителни средства во ова младо чудо од светот на вештачката интелигенција.

Според лица запознаени со ситуацијата, кои побарале да останат анонимни поради доверливоста на разговорите, фондот во последните денови бележи зголемен интерес од инвеститори од Силициумската долина. Засега, „Ситуејшнл Ауернес“ им порачал на потенцијалните инвеститори дека моментално не прифаќа нов капитал.

„Нашето чувство е дека тој ќе биде важна фигура во Силициумската долина уште многу години“, изјави Пат Грејди, партнер во „Секвоја капитал’, во интервју за ТВ Блумберг во четвртокот, коментирајќи ги турбуленциите околу „Ситуејшнл Ауернес“.

Последиците од кризата во „Ситуејшнл Ауернес“ го истакнаа големиот јаз меѓу начинот на размислување во Силициумската долина и на Волстрит. За финансискиот сектор, ова беше момент кога една ѕвезда од светот на ВИ мораше да ги научи лекциите за опасностите од прекумерното задолжување и управувањето со ризик. Но за многумина во Силициумската долина, неговата грешка претставува можност да купат по пониски цени и да продолжат да го поддржуваат поранешниот истражувач на „Опен еј-ај“, кој стана инвеститор.

„Силициумската долина и Волстрит реагираат различно“, вели Гигми Гоно, вонреден професор на Стерн скул оф бизнис при Универзитетот во Њујорк и директор во „Фокус инвестмент груп“. „Во суштина, Силициумската долина наградува луѓе кои точно ги препознаваат трансформативните технологии, додека Волстрит наградува создавање атрактивни приноси со истовремено зачувување на капиталот.“

Прашања од Волстрит

За многумина на Волстрит, драматичниот пад на угледот на Ашенбренер не беше изненадување. Историјата на индустријата е полна со фондови кои ги направиле вистинските инвестиции, но сепак пропаднале поради основни грешки во управувањето. Од колапсот на „Лонг трм капитал менаџмент“ кон крајот на 1990-тите до пропаста на „Архегос капитал“, прекумерното задолжување речиси секогаш било дел од проблемот.

Уште од самиот почеток, делови од Волстрит имаа резерви кон фондот на Ашенбренер. За разлика од повеќето конкуренти, најголем дел од неговите инвеститори беа богати поединци и семејни канцеларии од областа на заливот Сан Франциско, а не пензиски фондови и суверени инвестициски фондови кои вообичаено вложуваат во поетаблирани компании.

Иако „Голдман“, „ЏП Морган“ и „Банк оф Америка“ биле подготвени да му обезбедат финансиска подлога, други институции биле повнимателни. Одделот за примарно брокерство на „Берклис“ одбил да го прифати „Ситуејшнл Ауернес“  како клиент неколку недели пред кризата поради загриженост дека фондот бил премногу концентриран во еден сектор.

Според извори запознаени со случајот, и „Морган Стенли“ првично одбила да соработува со фондот поради неискуството на Ашенбренер. Но подоцна банката го променила ставот и планирала да го прифати фондот како клиент во наредните недели. Од „Морган Стенли“ одбија да дадат коментар.

Обложување на вештачката интелигенција

„Ситуејшнл Ауернес“ беше дел од мала група хеџ-фондови кои се фокусираат речиси исклучиво на индустријата за вештачка интелигенција. Иако акциите во овој сектор се многу нестабилни, тие воедно придонесоа за големи добивки кај одредени фондови.

Конкурентскиот фонд „ВАР едвајзерс“ (Value Aligned Research Advisors VAR Advisors), во чиј тим има ветерани од „Блекрок“ и „Хадсон ривер“, управувал со повеќе од 26 милијарди долари средства на крајот од јуни. Еден од неговите фондови насочени кон ВИ остварил принос од околу 194 отсто во првата половина од годината, значително повеќе од растот од речиси 10 отсто на индексот S&P 500.

Сепак, дел од инвеститорите навреме ги забележале ризиците. Еден фонд со слични позиции како „Ситуејшнл Ауернес“ започнал да се заштитува од потенцијални загуби поради стравувања дека фирмата на Ашенбренер ќе биде принудена масовно да продава акции.

„Да бидеме јасни, стануваше збор за исклучително концентрирани позиции, во истите акции во кои имаа вложено многумина, и сето тоа беше дополнително засилено со висока финансиска поддршка “, изјави Боб Слоун, основач на „Ес три партнерс“.

Нов почеток

По бурниот период, во кој Ашенбренер дури и се оженил минатата сабота, на Волстрит сега владее поголемо чувство на смиреност. Во писмо до инвеститорите испратено минатата недела, тој соопшти дека целосно ја отстранил финансиската поддршка од фондот, што значи дека повеќе не користи банкарски заеми за зголемување на своите облози, барем засега.

 

 

„Ова беа многу скапи лузни, но посветен сум да се погрижам тие да станат непроценливи лекции за нашата организација и за мене лично во иднина“, напиша Ашенбренер.

Сепак, падот на акциите поврзани со вештачката интелигенција минатиот месец беше толку силен што не ги поштеди ниту најголемите хеџ-фондови. „Милениум менаџмент“ забележа пад од 2,1 отсто во јули, „Поинт 72 асет менаџмент“ загуби 3,3 отсто, а фондот на „Алтиметер“ падна за 11 отсто.

Сега, додека Ашенбренер се обидува да ја исцрта новата стратегија за својот фонд, ќе треба повторно да го убеди Волстрит да му овозможи користење финансиска поддршка доколку сака да ги повтори високите приноси од почетокот на годината.

Но засега, тој и натаму ја има поддршката на многу инвеститори од Силициумската долина. Меѓу нив е и искусниот инвеститор во ризичен капитал Елад Гил, кој јавно објави дека побарал за првпат да инвестира во фондот на Ашенбренер.

„Постои архетип на херој кој се соочува со пад и потоа се враќа“, изјави Логан Бартлет, директор во „Редпоинт“. „Сега, откако Леополд доби силен удар, луѓето уште повеќе се обединуваат околу него.“