Трката по акции од Гранит го вивна прометот на Македонската берза

Драстично зголемување на прометот на Македонската берза има во текот на октомври, годинава, покажуваат податоците од новиот месечен билтен за берзанските показатели. Во октомври е остварен вкупен промет од 915,2 милиони денари (14,8 милиони евра), што е зголемување од 92,6 проценти во однос на септември кога вкупниот промет на берзата изнесуваше 475 милиони денари (7,7 милиони евра).

Растот на прометот главно се должи на зголеменото ниво на блок-трансакции и на една јавна берзанска аукција на акции, додека кај класичното тргување со акции во октомври има пад во однос на претходниот месец.

Во дел од блок-трансакциите и јавната берзанска аукција беа истргувани големи пакети акции од градежната компанија „Гранит“.  „Блумберг Адрија“ во неколку наврати пишуваше за акционерските поместувања во компанијата.

Имено, белградската компанија „Бард-Коп“ (Bard-Kop DOO) стана нов акционер што поседува пет отсто од акциите издадени од „Гранит“. Компанијата со седиште во Нов Белград купи 155.346 обични акции од македонската градежна компанија, кои претставуваат 5,61 проценти од вкупните акции со право на глас.

Како што пишувавме, отворениот задолжителен пензиски фонд „Сава пензиски фонд“ излезе од сопственичката структура на „Гранит“ откако на јавна аукција, одржана на Македонската берза, беше продаден пакет од 236.120 акции од градежната компанија. Пакетот на акции, кој претставуваше 7,69 проценти од сопственоста на „Гранит“, се продаде по цена од 1.450 денари за акција, односно за вкупна сума од 342 милиони денари (околу 5,5 милиони евра).

Претходно засилено купуваање акции имаше и од страна на менаџментот на градежната компанија.

Сега, освен „Бард-Коп“, акции над пет отсто од вкупниот капитал поседуваат градежното друштво „Гранит“, со посед од 9,81 проценти од обичните акции и Ивана и Зоран Милковски, кои имаат 8,84 проценти и 8,9 проценти од акциите, соодветно.