.webp){kind=icon}
Позитива на пазарите на капитал се очекува во втората половина од следната година, вели Лазе Камчев, главен извршен директор на „Генерали инвестментс“. Според него, каматните стапки ќе продолжат да растат веројатно и следната година.
„ФЕД веќе има најави дека можеби нема да е агресивно како и досега, но ќе видиме нови зголемувања на каматите. Очекуваме да биде на ниво од околу 5-5,25 отсто, додека ЕЦБ ќе ја следи монетарната политика на Американците и во тој контекст ќе продолжи да ја зголемува, иако можеби не до тоа ниво. Многу веројатно тоа ќе биде активност за следната година, но влијанието на пазарите пред сè ќе се однесува на тоа колку долго ќе биде висока каматната стапка, бидејќи ако таа почне да се релаксира во пократок временски период, пазарите ќе имаат порелаксирано движење“, објаснува Камчев во разговор за Блумберг Адрија ТВ.
Уште една важна работа, според Камчев, е колку пари ќе извлечат централните банки од системот.
„Овие две мерки реално ќе влијаат во борбата против инфлацијата, но таа нема да се смири прекуноќ. Очекувањата се дека можеби таргетираната инфлација од два отсто ќе ја видиме дури во 2025 година. Тоа значи дека очекувањата се следната година да дојде на околу шест или нешто повеќе проценти, 2024 година да биде 3,5 или речиси четири отсто, а дури во 2025 година да се стабилизира инфлацијата генерално“, вели Лазе Камчев.
Според него, од една страна има високи каматни стапки, од друга страна довербата на потрошувачите е намалена, но сето тоа сè уште не влијае толку многу лошо на пазарот на капитал.
„Очекувањата во инвеститорската јавност се дека некаде во втората половина од следната година ние ќе видиме некое свртување на целокупниот амбиент во позитивна насока. Очекувањата на компаниите се дека иако има благо намалување на профитите, сепак во 2023 година можно е да имаат слични профити како и 2022 година. Но сето тоа ќе биде директно под влијание на каматните стапки и пазарот, што значи дека ако целата ситуација потрае, реално ќе имаме дополнителен притисок на пазарот на капитал“, вели Камчев.
За очекувањата на домашниот пазар и ставот за најавените даночни реформи погледнете го целото видео. Разговорот со Лазе Камчев од „Генерали инвестментс“ е во вториот дел од емисијата „Зум ин“.
