Европските акции паднаа на претпоследниот ден на тргување во 2022 година, бидејќи ризиците поврзани со новиот пораст на случаите со ковид-19 се вратија на радарите на инвеститорите.
Индексот Stoxx 600 се намали за 0,5 проценти утрово во Лондон откако САД и Италија се приклучија на зголемениот број нации кои бараат тестови за ковид за патници од Кина поради загриженоста за порастот на инфекции во земјата.
Секторите кои претходно беа погодени од ограничувањата за време на пандемијата, како што се акциите од туристичката дејност се лизнаа, а слаби беа и акциите од секторите енергија и суровини. Единствената подгрупа во зелено беше технологијата.
Инвеститорите се загрижени за каква било потенцијална појава на нова варијанта на вирусот што би можела да ги врати ограничувањата на Кина на маса и да „удри врз растот“, рече Ипек Озкардескаја, виш аналитичар во „Свискуот Банка“ (Swissquote Bank).
Обемот на тргување се очекуваше да биде помал од нормалниот помеѓу Божиќ и Нова Година.
Денешниот пад доаѓа во време кога главниот репер за акции во Европа се движи кон најлошата година од 2018 година, со пад од околу 13 проценти во услови на намалување на економската активност, што е поттикнато од зголемената инфлација и напорите на централните банки да ја скротат. Поради тоа Stoxx 600 е на најниско ниво во последните две години, дури и по делумното закрепнување во последниве месеци поради надежите дека растот на цените се олади.
.webp){kind=icon}
