Индексот S&P 500 оствари најдобра недела од крајот на јануари

Американските акции ја завршија неделата на високо ниво, поттикнати од шпекулациите дека Федералните резерви (ФЕД) нема да ги зголемат каматните стапки над највисоките нивоа што веќе ги проектираа.

 

 

Растот на индексот S&P 500 во петокот, кој беше во плус за 1,6 отсто, помогна да се прекине тринеделната серија загуби. Технолошкиот индекс Nasdaq 100, кој доби два процента на вредноста, го постигна својот најдобар ден од почетокот на февруари.

Расположението остана позитивно и покрај извештајот, кој покажува отпорност во услужниот сектор, бидејќи некои инвеститори се обложуваа дека влијанието врз економијата од зголемувањата на ФЕД ќе биде одложено. Мерката на цените што ги плаќаат давателите на услуги покажа дека трошоците се зголемуваат со побавно темпо, што беше поздравено од трговците.

Приносите на обврзниците се зголемија оваа недела, при што десетгодишниот принос се движи околу 3,96 проценти.

Референтната вредност на доларот ја имаше својата најлоша недела од средината на јануари, ставајќи крај на низата од четири последователни недели со добивки. Вредноста на еврото во однос на доларот вчера порасна за 0,3 проценти, на 1,0634 долари.

Следната недела сите очи ќе бидат вперени во извештајот за платните списоци, барајќи индиции за тоа дали економијата може да се справи со повеќе покачувања на каматните стапки. Податоците оваа недела покажаа континуирана отпорност на пазарот на трудот во САД, поддржувајќи ја идејата ФЕД да се држи до својата политика на заострување, тема што во февруари го турна речиси секое големо средство во минус. Но инвеститорите беа охрабрени откако Рафаел Бостиќ од ФЕД Атланта во четвртокот рече дека централната банка веројатно би можела да го паузира зголемувањето на каматите некаде ова лето. Трговците ги протолкуваа неговите коментари како слатки, иако Бостиќ и неговите колеги рекоа дека одлуките ќе продолжат да зависат од статистичките податоци и во вчерашниот извештај на ФЕД беше нагласено дека се очекуваат дополнителни зголемувања на стапките.

„Трговците сè уште се оптимисти, затоа што дури и најјастребовски расположените функционери на ФЕД не сугерираа дека стапките можеби треба да ги надминат веќе проектираните максимални нивоа“, рече Прија Мисра, глобална раководителка на стратегија за каматни стапки во „ТД секјуритис“ (TD Securities), додавајќи дека  е потребно долго време, бидејќи политиката стана рестриктивна само минатата година.

На другите пазари, нафтата ВТИ порасна за два процента, на 79,74 долари за барел.

Златото, пак, доби 1,1 отсто на вредноста и сега една унца чини 1.861,30 долари.

Криптопазарот се соочува со нова серија остар пад, со што најголемиот токен, биткоинот, вчера падна за 4,8 проценти и сега неговата вредност е 22.296,29 долари, а етерот загуби пет проценти од вредноста и сега е на ниво од 1.558,57 долари.