Растат фјучерсите во САД и Европа, пад на акциите во Азија

Европските и американските фјучерси на акции напредуваа, додека азиските акции ги намалија загубите, а државните обврзници паднаа откако „Кредит Суис“ (Credit Suisse Group AG) соопшти дека ќе позајми пари од швајцарската централна банка и ќе се обиде да го откупи долгот.

 

 

Договорите за европскиот индекс Euro Stoxx 50 се искачија за повеќе од два отсто, бидејќи вестите од „Кредит Суис“ обезбедија доза на смиреност за нервозните инвеститори. Банката се договори да позајми дури 50 милијарди франци (54 милијарди долари) од ликвидносниот капацитет на Швајцарската национална банка и ќе понуди да откупи до три милијарди франци долг деноминиран во долари и во евра. Швајцарскиот франк зајакна по вестите за нестабилната трговија по вчерашната остра распродажба.

Еврото благо зајакна пред очекуваното зголемување на каматните стапки од страна на Европската централна банка (ЕЦБ), што треба да се случи во текот на денешниот ден, при што повеќе инвеститори сега се обложуваат на потег од 25 базични поени, по претходните очекувања за двојно поголемо покачување на каматите.

Азиските акции повратија одредени загуби од претходното тргување. Финансиските компании се меѓу најтешко погодените. Договорите за S&P 500 се зголемија за околу 0,4 отсто, откако индексот вчера падна за 0,7 проценти. Технолошките акции понудија светла точка, бидејќи трговците почнаа да предвидуваат дека каматните стапки ќе се искачуваат помалку од очекуваното. Фјучерсите на Nasdaq 100 напредуваа утрово.

Bloomberg Mercury

 

Продажбата на банкарските акции вчера го повлече индексот на банките KBW, една од најшироките мерки на американскиот банкарски систем, за повеќе од три отсто надолу. Акциите на „Фрст рипаблик банк“ (First Republic Bank) паднаа за повеќе од една петтина.

Трговците беа речиси рамномерно поделени околу тоа дали Федералните резерви (ФЕД) ќе ги зголемат каматните стапки кога банкарите ќе се состанат следната недела. Пазарните цени сега сугерираат дека ФЕД наскоро ќе се сврти и ќе ги намали стапките дури за еден отсто до крајот на годината.

„Оваа епизода не е иста како во 2008 година. Тоа не е кредитна криза, туку криза на средства. Предизвикот што сега е откриен е фантазијата на пазарот за ризичен капитал, приватен капитал и комерцијални недвижности“, рече Николас Ферес, главен инвестициски директор на „Вентејџ поинт“ (Vantage Point Asset Management).

На другите пазари, бакарот и алуминиумот напредуваа. Златото се тргуваше блиску до највисокото ниво во последните шест недели, поради знаците дека проблемите во банкарскиот сектор може да предизвикаат ФЕД да го паузира зголемувањето на каматните стапки.