Азиските акции во пад, американските и европските растат

Азиските акции паднаа, американските фјучерси флуктуираа, а договорите за Европа незначително пораснаа во денешното утринско тргување.

 

 

Индексот S&P 500 порасна за 1,4 отсто, а технолошкиот индекс Nasdaq 100 ја зголеми својата вредност за 1,9 отсто. Европските фјучерси пораснаа за 0,4 отсто. Азиските акции, пак, главно се во негатива и нивниот пад се движи од 0,2 до 0,9 отсто. Падовите на јапонските и кинеските акции делумно му се припишуваат на ребалансот на крајот од кварталот. Придушеното дејство се спротивстави на добивките на Волстрит во текот на ноќта, што го турнаа Nasdaq 100 на биковски пазар во услови на облози дека врвот на каматните стапки е близу и дека банкарските превирања ќе продолжат да се намалуваат.

Квартална промена на индексот Nasdaq 100 / Bloomberg Mercury

 

Со тоа, технолошкиот индекс, кој ги вклучува „Епл“ (Apple Inc), „Мајкрософт“ (Microsoft Corp) и „Амазон“ (Amazon.com), се затвори на највисоко ниво од август, како знак дека инвеститорите се подготвуваат Федералните резерви (ФЕД) да го прекинат циклусот на зголемување на каматните стапки и потенцијално да се свртат кон полабави политика подоцна оваа година.

Вредноста на еврото е сосема малку променета во однос на доларот и курсот на овие две валути е 1,0841 долар за едно евро. Доларот денеска го намали претходниот напредок во Азија, откако зајакна додека инвеститорите ги анализираат најновите забелешки на претставници на ФЕД и ги очекуваат податоците за базичната инфлација во САД, кои се индиција за следниот потег на ФЕД. Инвеститорите сега очекуваат стапките во САД да се движат околу 4,3 проценти до крајот на годината, односно за околу 70 базични поени пониско од сегашното ниво.

„ФЕД останува во многу тешка позиција. Бидејќи банките се стабилизираат, инфлација сè уште е над целта, пазарот на трудот сè уште е историски силен, а ФЕД очајно треба да го обнови кредибилитетот, сметаме дека каматните стапки ќе се зголемат за 25 базични поени на 3 мај“, напиша Крис Сењек од „Волф рисрч“ (Wolfe Research).

Цената на златото падна за 0,2 процента, на 1.961,21 долар.

На криптопазарот сликата е мешана. Биткоинот порасна за 0,5 отсто, искачувајќи се на 28.548,5 долари, а етерот падна за 0,5 проценти, на 1.793,7 долари.