Индексите на берзите растат, вредноста на доларот паѓа

Азиските акции и фјучерсите на европските акции напредуваа бидејќи утрово се зголеми позитивниот момент по доцното синоќешно закрепнување во постпразничното тргување на Волстрит.

 

 

Индексот S&P 500 порасна за 0,1 отсто, а технолошкиот индекс Nasdaq 100 претрпе сосема мала промена. Фјучерсите за европските акции се зголемија за 0,6 отсто. На азиските пазари утрово берзанските индекси главно се движат во позитивната зона, со добивка меѓу 0,1 и 0,9 отсто, освен шангајскиот индекс, кој загуби 0,4 отсто од својата вредност.

Вредноста на доларот се намали по три дена добивки и во однос на еврото се тргува по курс од 1,0882 долар за евро.

Пазарите ја проценуваат големата веројатност дека Федералните резерви (ФЕД) ќе ги зголемат каматните стапки за четвртина поен на 3 мај за да ја зауздат инфлацијата. Тоа е различно од азиските централни банки, кои почнуваат да паузираат. Приносите на државните обврзници се пониски. Приносот на двегодишните обврзници, кои се чувствителни на монетарната политика, се намалија утрово под четири отсто, откако вчера се искачија, бидејќи трговците се позиционирани за зголемување од страна на ФЕД.

Вчера во САД индексот S&P 500 оствари добивка во последните минути од сесијата, откако поголемиот дел од денот го помина во минус. Технолошкиот индекс Nasdaq 100 ги намали загубите до крајот, завршувајќи маргинално пониско под влијание на извештајот на „Епл“ (Apple Inc) дека испораките на персонални компјутери нагло паднаа. Инвеститорите сега го чекаат извештајот за потрошувачките цени, кој треба да биде објавен утре, а се очекува да покаже месечен пораст од 0,4 отсто на основниот индекс на потрошувачки цени.

На другите пазари, биткоинот се искачи над 30.000 долари за првпат од јуни, зголемувајќи се за повеќе од 80 проценти од почетокот на годината. Поточно, најголемата криптовалута ја зголеми својата вредност дури за 3,6 отсто и чини 30.177,56 долари. Етерот, пак, порасна за два отсто, на 1.923,25 долари.

Златото се покачи за 0,3 отсто, доближувајќи се до границата од 2.000 долари, односно во моментов унца чини 1.997,68 долари.