Индексите во пад, се чека новата одлука на ФЕД

Статистичките бројки покажаа заладување на американскиот пазар на трудот пред тоа што се очекува да биде последно зголемување на каматните стапки на Федералните резерви (ФЕД) во нивниот тековен циклус на затегнување на монетарната политика. И обновената загриженост за банкарскиот сектор во САД го зголеми притисокот за продажба.

Според тоа, индексот S&P 500 утрово загуби 1,2 отсто од вредноста, а технолошкиот Nasdaq 100 падна за 0,9 отсто. Не е мал ниту падот во Азија, каде што негативата на берзанските индекси е во распон од 0,9 до 1,7 отсто.

Азиско-пацифичкиот индекс на MSCI Inc. се упати кон својата прва загуба во последните пет дена, при што референтните индекси во Хонгконг, Јужна Кореја и Австралија беа во пад. Енергетските и банкарските акции беа меѓу најголемите губитници. Пазарите  во Јапонија и континентална Кина се затворени поради празници.

Вредноста на еврото се зголеми за 0,3 отсто во однос на американскиот долар, со што нивниот курс за размена сега е 1,1030 долар за евро. Златото поскапе за 0,1 отсто, што беше доволно да се искачи над психолошката граница од 2.000 долари. Поточно, унца утрово чини 2.018,70 долари.

На криптопазарот нема позитивно расположение. Вредноста на биткоинот падна за 0,6 проценти, на 28.534,25 долари, а етерот загуби 0,4 отсто од вредноста и падна на 1.863,68 долари.

Во моментов нема коментари за веста. Биди прв да коментира...

Остави коментар