Тргување со акции без трошоци следната среда на Македонската берза

Со цел промовирање на уште поактивно учество на домашните индивидуални инвеститори на македонскиот пазар на хартии од вредност и вложување на населението во акции издадени од домашните компании, Македонската берза на 13.09.2023 година (среда), по четврти пат го организира настанот „Инвеститорски ден“.

„Оваа иницијатива ја прифатија и во неа активно се вклучија Централниот депозитар за хартии од вредност, сите десет членки на Берзата и ЦДХВ, а истата доби поддршка и од Комисијата за хартии од вредност“, соопшти берзата.

Одржувањето на „Инвеститорскиот ден“ значи дека на тој ден на тргување на берзата сите домашни физички лица можат да тргуваат со акции на сите пазарни сегменти без трансакциски трошоци што ги наплатуваат овластените пазарни институции и учесници.

„Поконкретно, на „Инвеститорскиот ден“ сите домашни физички лица ќе можат да купат или продадат кои било акции без да ги платат провизиите кон берзата, ЦДХВ и овластените пазарни учесници (банки и брокерски куќи) што се вклучени во оваа иницијатива“, информираат од берзата.

Оттаму укажуваат дека при тоа инвеститорите ќе треба да склучат нормални трансакции со акции преку БЕСТ системот, со посредство на некоја членките на берзата. Износот на остварениот дневен промет по индивидуален инвеститор не може да изнесува повеќе од 10.000 евра, независно од бројот на берзански трансакции преку кои истиот ќе биде остварен, а трансакциите треба да бидат склучени преку клиентска, односно сопственичка сметка.