Разочарувачката заработка на дел од „седумте величенствени“ ги тресе САД

Дел од таканаречените „седум величенствени“ технолошки компании што го поттикнаа годинешниот раст на американските акции објавија разочарувачки заработувачки, бришејќи 200 милијарди долари од нивната пазарна вредност. Ваквите резултати се закануваат да го турнат надолу S&P 500.

Вредноста на акциите на „Алфабет“, компанија која е сопственик „Гугл“, на „Тесла“ и на „Мета“, матичната компанија на „Фејсбук“ падна по објавувањето на финансиските резултати, а единствената светла точка е „Мајкрософт“. „Амазон“ треба да ги објави резултатите денес по затворањето на берзата, а пазарот на опции овозможува еднодневно поместување на акциите од 8,1 проценти во која било насока - ставајќи во игра околу 100 милијарди долари пазарна вредност. Преостанатите два технолошки гиганти „Епл“ и „Енвидија“ (Nvidia Corp.) треба да ги објават извештаите следниот месец.

Седумте компании беа приказна на годината на берзата предизвикувајќи луд интерес со вештачката интелигенција што поттикна добивки за многу од нив. Оптимизмот опаѓа поради повисоките каматни стапки и војната на Блискиот Исток - S&P 500 падна за 8,8 проценти од својот врв во 2023 година, ставајќи го на дофат падот од 10 проценти што се дефинира како надолна корекција на биковскиот пазар.

Сепак, останува уште многу еуфорија. Технолошкиот Nasdaq 100 Index, доминиран од „седумте величествени“ останува во пораст од 31 проценти за годинава, што значи дека има голем простор за пад на пазарот.

Резултатите на „Мета“ ќе тежат на пазарот кога ќе почне тргувањето. Акцијата падна за 2,4 проценти во претпазарното тргување, откако гигантот на социјалните мрежи ги урна надежите на инвеститорите за долгорочно закрепнување на рекламирањето, велејќи дека тоа се должи на несигурното економско опкружување.

Ова доаѓа по бришењето на речиси 180 милијарди долари од пазарната вредност на „Алфабет“ во средата, откако клауд-единицата на компанијата објави помала добивка од очекуваното. Станува збор за најголемото бришење на пазарната вредност за една сесија кај овој гигант за пребарување. Претходно во месецот, вредноста на „Тесла“ се намали за 72 милијарди долари за еден ден по објавата на финансиските резултати.

Засега единствената трошка надеж меѓу големите седум е „Мајкрософт“. Производителот на софтверот „Виндоус“ имаше раст на акциите и додаде околу 75 милијарди долари пазарна вредност во средата, откако софтверскиот гигант објави резултати за првиот квартал кои ги надминаа очекувањата.

„Алфабет“ и „Мајкрософт“, кои го следат „Амазон“ во клауд-инфраструктурата, се тркаат да создадат понуди за вештачка интелигенција преку кои своите платформи ќе ги направат попримамливи за клиентите.

 

 

Во моментов нема коментари за веста. Биди прв да коментира...

Остави коментар