Страста на јужнокорејските трговци за производи поврзани со батерии за електрични возила поттикна неверојатен подем на производител на катоди, чии акции годинава имаат најдобри перформанси во светот.
Акциите на компанијата „Екопро“ (Ecopro) со леснотија ги надминаа сите компании во Bloomberg World Index со вкупно 2.647 члена, при што годинава остварија поврат од 571 отсто, со повеќе од 200 процентни поени пред второпласираната „Кум Јанг“ (Kum Yang), уште една корејска компанија исто така во центарот на треската за електрични возила.
„Екопро“ е одличен пример за незапирливата возбуда на купувачите на мало, што годинава предизвика големи промени во некои јужнокорејски акции. Голем број фактори придонесоа за зголемениот интерес за производителите на батерии и нивните доставувачи во земјата. Овие фактори го вклучуваат афинитетот на малопродажните инвеститори кон пазарите со висока нестабилност, оптимистичките прогнози од популарните јутјубери и зголемената контрола на САД врз кинеските конкуренти, а сето тоа го привлече вниманието на индустријата.
Вредноста на акциите на компанијата доживеа експлозивен раст во првата половина од годината, скокајќи од првичните 110.000 вони на почетокот на 2023 година на повеќе од десет пати од вредноста во рок од само седум месеци. Тој драматичен раст ги привлече инвеститорите што бараат брз профит додека ги маргинализираше оние што се обложуваа на пад на акциите, особено кога летоска односот цена-заработка на компанијата надмина 500.
Пред неодамнешната забрана на владата за продажба на акции на кратко, „Екопро“ беше една од акциите со најголем број краткорочни продажби во Јужна Кореја. Акциите се тргуваа по цена од 691.000 вони во Сеул во 15.19 часот по локално време во четвртокот, со пазарна капитализација од приближно 14 милијарди долари. Акцијата сè уште се тргува со 96 пати поголема цена од нејзината реална заработка.
Растот на цената на акциите беше делумно поттикнат од очекувањата за зголемена побарувачка за батерии за електрични возила, но акциите продолжија да растат дури и откако некои аналитичари ги намалија процените за побарувачката. Акцијата сега е намалена за речиси 50 отсто од својот врв во јули, и моментално има два рејтинга за продажба, еден рејтинг за задржување и ниедна препорака за купување.
Подемот на „Екопро“ исто така во голема мера го зголеми богатството на нејзиниот основач Ли Донг-Чае, кој во моментот е во затвор поради трговија со доверливи информации. Тој и неговото семејство годинава го зголемија своето богатство за околу 3,3 милијарди долари, достигнувајќи вкупно 3,6 милијарди долари, според индексот на милијардери на „Блумберг“. Паралелно со тоа, „Адаро минералс“ (PT Adaro Minerals Indonesia) забележа пад од 19 проценти годинава, откако беше акција со најдобри перформанси во 2022 година, со добивка од 1.595 проценти.
.webp){kind=icon}