Раст на вредноста на европските акции

Порасна вредноста на европските акции денеска додека инвеститорите ги очекуваат податоците за инфлацијата во САД и заработката на „Енвидија“ (Nvidia Corp.) подоцна оваа недела. Индексот Stoxx 600 додаде 0,3 проценти во 8:55 часот во Лондон, откако ја прекина тридневната победничка серија во претходната сесија. Рударството и секторите за лична нега забележаа подобри резултати, додека малопродажбата заостана.

Поединечно, се намали вредноста на акциите на „Асошиејтед Бритиш Фудс“ (Associated British Foods Plc) бидејќи „Дојче банк“ (Deutsche Bank) го промени рејтингот од продавање во задржување. „Дајмлер Трак Холдинг“ (Daimler Truck Holding AG) падна бидејќи „Голдман Сакс“ (Goldman Sachs) го намали рејтингот на неутрален. Акциите на „Бунцл“ (Bunzl Plc) пораснаа откако дистрибутивната група ги зголеми насоките за профитот за целата година.

Реперот за акционерски капитал во Европа се приближува до рекордно високо ниво по сигналите на Федералните резерви околу изгледите за каматните стапки. Сепак, инвеститорите остануваат дефанзивни, а акциите за здравствена заштита и осигурувањето се меѓу најпреферираните сектори додека автомобилската индустрија и рударството заостануваат.

Фокусот оваа недела ќе биде ставен на индексот на личните потрошувачки трошоци на САД, кој треба да се објави во петок, за дополнителни индиции за тоа колку ФЕД најверојатно ќе ги намали каматните стапки. Инвеститорите, исто така, ќе ја следат кварталната заработка на „Енвидија“ (Nvidia) во среда за да ја проценат силата на секторите поврзани со вештачката интелигенција.

„За една недела на лесни податоци на макро фронтот, европските акции најверојатно ќе бидат поттикнати повеќе од вообичаено од случувањата во САД“, рече стратегот на „Панмјур Либерум“ (Panmure Liberum), Жоаким Клемент. „Сè уште сме оптимисти дека ‚Енвидија‘ ќе ги надмине очекувањата, но секој знак на слабост во бројките може да доведе до назадување не само на американските технолошки акции, туку и на европските технолошки компании“.

Францускиот индекс CAC40 порасна за 0,3 проценти. Францускиот претседател Емануел Макрон ќе ги продолжи консултациите за назначување премиер, откако ја отфрли можноста за влада предводена од левичарската кандидатка Луси Кастес во корист на можна центристичка коалиција.