„Дипсик“ уште повеќе ќе ја поттикне индустријата, велат инвеститори

Инвеститорите во ризичен капитал вложиле повеќе од 300 милијарди долари во стартапи за вештачка интелигенција во САД во последните пет години - огромна инвестиција што неделава беше доведена во прашање со објавувањето на новиот евтин и ефикасен модел од кинеската компанија за вештачка интелигенција (ВИ), „Дипсик“ (DeepSeek).

„Дипсик“ веќе ги потресе јавните пазари, при што инвеститорите го спуштија Nasdaq за 3 проценти во понеделникот, што е еквивалентно на намалување од 1 трилион долари. И бидејќи толку многу инвеститори во ризичен капитал од Силициумската Долина целосно се вложиле во ВИ, според податоците на „Пичбук“ (PitchBook), приватните пазари би можеле да бидат уште повеќе изложени.

Но инвеститорите во ризичен капитал од фирми како „Ватери венчурс“ (Battery Ventures), „Андресен Хоровиц“ (Andreessen Horowitz) и „Менло венчурс“ (Menlo Ventures) не се вознемирени. Наместо тоа, тие велат дека појавата на силен кинески ривал може да послужи како мотивација за технолошките компании во САД и да доведе до побрзо прифаќање на ВИ - при што многумина ја истакнуваат можноста претставена од потенцијалните пробиви во ефикасноста што ги ветува новиот модел.

Инвеститорите што бегаат од технолошките акции „неосновано паничат“, вели Гери Тан од „Уај комбинатор“ (Y Combinator). „Намалувањето на трошоците за обука и зголемувањето на способностите ќе создадат побарувачка“.

Особено стартапите што прават софтвер базиран на облак за компании би можеле да имаат големи придобивки од секое намалување на трошоците за ВИ, смета Тан. Ефектот на „Дипсик“ ќе биде повеќе стартапи од кога било „да преминат од нула до 10 милиони долари годишно во приходи“, напиша тој во објава на X. „Илјада цвеќиња ќе процветаат!“

Американските акции паднаа откако вознемиреноста околу „Дипсик“ ги потресе пазарите Bloomberg

Глобалните истражувачи на ВИ ќе се обидат брзо да ги реплицираат добивките во ефикасноста на „Дипсик“, смета Кајл Харисон, генерален партнер во „Контрари венчурс“ (Contrary Ventures). Отворените модели и научниот напредок „туркаат сè напред“, рече тој. „Можете да се обложите дека секоја компанија од ’Опен еј-ај’ до ’Мистрал’ ќе ги преземе тие пристапи и ќе ги искористи за своите производи. Така што тоа е добро“.

Некои компании за ВИ можеби се преценети, додаде Харисон, но понеделничкиот пад на јавниот пазар „е целосно ирационален и на граница на глупост“.

Неколку инвеститори рекоа дека успехот на „Дипсик“ ќе ги поттикне стартапите во САД. „Конкуренцијата ги прави сите подобри“, рече партнерот на ПВП (Pelion Venture Partners), Тајлер Хог. Тој посочи дека е загрижен за улогата што кинеската влада може да ја има во компанијата, но верува дека технологијата ќе овозможи „да се формираат повеќе бизниси поради пониските трошоци“.

Покрај повикот за обединување, „Дипсик“ исто така нуди предупредување за технолошките компании во САД, рече Венки Ганесан, партнер во „Менло“.

„Тоа е вистинско будење за САД во однос на трката за ВИ“, вели Ганесан, чија фирма инвестираше во „Антропик“ (Anthropic). Тој го спореди напредокот со рускиот сателит што ги поттикна САД да напредуваат со својата вселенска програма. „’Дипсик’ е ’спутник момент’ во сферата на ВИ“, појасни тој.

Од милијардите што инвеститорите во ризичен капитал ги вложиле во стартапи за ВИ, многу отишле во компании како „Антропик“, „Опен еј-ај“ и „Екс еј-ај“ (xAI) на Илон Маск, кои градат таканаречени основни модели. Овие модели служат како технолошка основа за други стартапи и се неверојатно скапи за изградба. Овие компании сега се наоѓаат во дефанзива, под притисок брзо да гo достигнат напредокот што очигледно гo направи „Дипсик“. Повеќе од 40 милијарди долари во 2023 и 2024 година отидоа за инвестиции во бизниси со основни модели, според „Пичбук“.

Најновите вести би можеле да понудат оправдување за инвеститорите што избраа главно да ги избегнат тие големи рунди на финансирање и, наместо тоа, се фокусираа на стартапи што користат ВИ за поспецифични апликации. На пример, правната компанија „Харви“ (Harvey), стартапот за усогласеност „Ванта“ (Vanta) и здравствените бизниси како стартапот за откривање рак „Фрином“ (Freenome) се потпираат на ВИ и би имале корист ако трошоците се намалат.

Дармеш Такер од „Батери“ во голема мера ги избегнуваше обложувањата на најголеми компании. Кон крајот на 2022 година тој направи аналогија со раната ера на интернетот, споредувајќи ги основните модели со компаниите за оптички влакна од крајот на 1990-тите и велејќи дека тие не излегле „како големи победници“. Наместо нив, тоа беше „Амазон“ (Amazon), со својата исклучително популарна страница за купување, како и Фејсбук (Facebook) и Инстаграм (Instagram) со своите вирални рекламни услуги итн., кои имаа корист и прераснаа во исклучително вредни компании“.

Неделава Такер рече дека иако имал некои резерви за тоа дали трошоците на „Дипсик“ се толку ниски како што беше прикажано, неговите резултати се важни. Добивките во ефикасноста покажуваат дека идејата за градење поголема компјутерска моќ за ВИ „може да биде одлична за маркетинг, но на крајот не носи економска вредност над одредена точка“, напиша тој во електронска порака.

На крајот, корисноста на ВИ-алатките ќе ги лансира или ќе ги погуби компаниите што ги прават, рече генералниот партнер на „Андресен Хоровиц“, Виџај Панде. Производите се тие „каде што можете да се разликувате, а тоа секогаш ќе биде во апликациите“ наместо во инфраструктурата. Тој го нарече појавувањето на „Дипсик“ „инспирација“ и истовремено „предупредување“.