Загрепската берза повторно го зголеми уделот во Македонска берза

Zagreb Stock Exchange, Inc. (Загрепска берза) докупила уште осум акции на Македонска берза, АД, известија од берзата во Хрватска. Со последната трансакција Загрепската берза поседува 29,98 проценти од акциите на Македонска берза. Претходно на 18 август беше извршена купопродажба на 138 акции од Друштвото, а сите 146 акции сочинуваат 5,23 отсто од вкупниот капитал. 

„Трансакциите се целосно финансирани од сопствени ресурси на Загрепската берза. Бидејќи Берзата стекна 691 акција или 24,75 отсто од акционерскиот капитал на Друштвото во претходни трансакции, со овие трансакции Загрепската берза го зголеми сопственичкиот удел во Македонска берза на 837 акции или 29,98 проценти, стои во известувањето од Македонска берза.

Bloomberg Adria на 8 јули пишуваше за претходните трансакции која Загрепската берза се стекна со дополнителен удел во Македонската берза и стана најголем акционер на берзата во Скопје.

Загрепската берза е акционер во Македонската берза од крајот на 2019 година кога купија 5,3 отсто од капиталот. Тоа беше втор пат берзата од Хрватска да купува удел во друга регионална берза откако претходно се стекна со 100 отсто од капиталот во Љубљанската берза во 2015 година, купувајќи ја од Виенската берза.

Во текот на 2021 година, уделот во Македонската берза беше зголемен на 7,06 отсто од сопственоста, а до јуни годинава во два наврати до 17,05 отсто. Од Загрепска берза велат дека сите трансакции се финансирани со сопствени средства. Претходно македонскиот регулатор, Комисијата за хартии од вредност даде согласност на Загрепската берза да стекне до 30 отсто од акциите.

„Загрепската берза и Македонската берза долги години многу успешно соработуваат на размена на знаења и искуства, интензивно од 2014 година, кога е основана SEE Link d.o.o заедно со Бугарската берза. Впрочем на таков начин три берзи делат еднакви сопственички акции. Соработката беше интензивирана во 2019 година, кога Македонската берза потпиша ексклузивен договор за соработка со хрватската компанија Funderbeam South-East Europe d.o.o. (Funderbeam SEE), во која Загрепската берза има 30 отсто сопственост и е дел од естонската Funderbeam Group, која управува со платформа за финансирање стартапи. Целта на ова партнерство е да им се претстават на македонските компании можности за прибирање капитал преку оваа иновативна платформа со цел понатамошен развој на бизнисот и созревање до фаза на потенцијално котација на Македонската берза, соопштија од Загрепска берза.