Златна треска на Волстрит: Банките заработија 500 милиони долари поради стравот од царини

Трговците со благородни метали во водечките банки, вклучувајќи ги „ЏП Морган“ (JPMorgan Chase & Co.) и „Морган Стенли“ (Morgan Stanley), во првиот квартал постигнаа најдобри резултати во последниве пет години, делумно поради можноста што предизвика бран на увоз на благородни метали во САД.

Дванаесет водечки банки оствариле вкупен приход од 500 милиони долари од трговија со благородни метали во првиот квартал од 2025 година — втората највисока бројка во изминатата деценија, според податоците собрани од „Крисил коалишн гринвич“ (Crisil Coalition Greenwich). Тоа е приближно двојно повеќе од просечната квартална заработка во последните десет години.

Дел од овој голем приход доаѓа од профитабилната премија за благородни метали во САД, бидејќи стравувањата дека ќе бидат воведени царини ги натераа трговците да пренесат огромни количини злато и сребро во складиштата на американската берза за фјучерси.

Цените на златото и среброто на њујоршката Комекс (Comex) берза пораснаа над другите меѓународни репери во првиот квартал, што овозможи трговците да купуваат благороден метал во трговски центри како Лондон, Швајцарија или Хонгконг и да го транспортираат до САД за да остварат профит пред евентуалното воведување царини. Слична ситуација се случи и во 2020 година, кога пандемијата ги приземји комерцијалните летови, создавајќи долготрајна можност за банките што најдоа начин да пренесат злато до Њујорк.

„Морган Стенли“ испорача повеќе злато за да ги порамни своите сопствени позиции на Комекс отколку која било друга банка во првиот квартал, испорачувајќи 67 метрички тони злато, според податоците од берзата. Таа количина метал во моментов вреди околу 7 милијарди долари.

„ЏП Морган“, која е доминантен трговец со благородни метали, испорача злато во вредност од над 4 милијарди долари за порамнување на февруарските фјучерси, што претставува една од најголемите дневни испораки во историјата на берзата. Тргувањето престана во април, откако благородните метали беа изземени од царинскиот пакет на претседателот Доналд Трамп.

„ЏП Морган“ и „Морган Стенли“ се воздржаа од коментар. 

Bloomberg

Банките што тргуваат со благородни метали — особено „ЏП Морган“ – имаат историја на профитирање од разлики во цените помеѓу Европа и САД. „ЏП Морган“ на овој начин оствари рекордна заработка од 1 милијарда долари во 2020 година.

Нестабилноста предизвикана од развојот на царинските планови на претседателот Доналд Трамп исто така ја зголеми заработката на овие 12 банки, изјави Ангад Чатвал, директор за фиксни приходи, валути и стоки во „Коалишн“. Трговскиот обем на лондонскиот пазар исто така порасна во последниве години, наспроти заднината на спектакуларниот пораст на цената на златото, која е двојно повисока од крајот на 2022 година.