Акциите на „Сиско“ скокнаа благодарение на побарувачката за ВИ

Акциите на „Сиско“ (Cisco Systems Inc.) пораснаа во доцнежното тргување откако гигантот за мрежна опрема ја зголеми својата прогноза за 2026 година, покажувајќи напредок во настојувањето да освои поголем дел од трошењето поврзано со вештачката интелигенција.

Компанијата, најголемиот производител на опрема што ги што ги управува компјутерските мрежи и интернетот, сега очекува приходи до 61 милијарда долари во фискалната година што завршува во јули. Тоа е околу една милијарда повеќе од претходната проекција и над процените на Волстрит. „Сиско“ ја зголеми и прогнозата за заработка, која исто така ги надмина очекувањата на аналитичарите.

Bloomberg

Прогнозата внесе нов оптимизам дека „Сиско“ може да има корист од силното трошење за вештачка интелигенција. Компанијата од Сан Хозе, Калифорнија, ги обновува своите чипови и мрежна опрема за подобро поврзување на серверските рамки и дата-центрите, со цел да се обработуваат покомплексни задачи поврзани со ВИ.

Во овој сегмент се натпреварува со компании како „Бродком“ (Broadcom Inc.) и „Хјулит Пакард“ (Hewlett Packard Enterprise Co.), сопственик на „Џунипер нетворкс“. Но „Сиско“ се здружи со водечкиот производител на чипови „Енвидија“ (Nvidia Corp.), што ѝ дава дополнителна предност.

Побарувачката за технологијата на „Сиско“ ја нагласува потребата од безбедни мрежни решенија „додека клиентите брзо се обидуваат да го искористат потенцијалот на ВИ“, наведе во соопштение извршниот директор Чак Робинс.

Акциите пораснаа до 6,9 отсто во претпазарното тргување во четвртокот. Акциите на „Сиско“ пораснаа за 25 отсто од почетокот на годината до затворањето на берзата.

Компанијата очекува заработка од 4,14 долари по акција во фискалната 2026 година, исклучувајќи одредени ставки. Тоа е повисоко од просечната процена од 4,05 долари по акција, покажуваат податоците од „Блумберг“ (Bloomberg).

За време на конференцискиот повик со аналитичари, Робинс изјави дека можностите поврзани со ВИ ќе почнат значително да се зголемуваат во втората половина од фискалната година.

Bloomberg

Компанијата соопшти дека приходите во фискалниот втор квартал, кој трае до јануари, ќе изнесуваат од 15 до 15,2 милијарди долари. Тоа е над просечната процена на Волстрит од 14,7 милијарди долари. Коригираната заработка ќе изнесува околу 1,02 долар по акција, во споредба со проекцијата од 99 центи.

Во фискалниот прв квартал, кој заврши на 25 октомври, продажбата на „Сиско“ порасна за 8 отсто, на 14,9 милијарди долари. Добивката изнесуваше 1 долар по акција, исклучувајќи одредени ставки. Аналитичарите предвидуваа приходи од 14,8 милијарди долари и заработка од 98 центи по акција.

Нарачките за инфраструктура за ВИ од големите провајдери достигнаа 1,3 милијарда долари во периодот, соопшти компанијата. „Сиско“ во претходниот квартал имаше 800 милиони долари од вакви продажби.

Во обид да го диверзифицира бизнисот, Робинс се фокусираше на безбедносни производи и додаде софтвер за мониторинг преку купувањето на „Спланк“ (Splunk Inc.) за 28 милијарди долари во 2024 година.

„Забрзувањето на ВИ кај ‘Сиско’ не се намалува“, напиша аналитичарот на „Блумберг интелиџенс“ (Bloomberg Intelligence) Ву Џин Хо. И со зголемената прогноза, изгледите сè уште треба да бидат претпазливи, рече тој, „со простор за умерен раст нагоре“.