Волстрит оптимистичен – аналитичарите предвидуваат двоцифрен раст на S&P 500 во 2026 година

Како што се приближува крајот на 2025 година, водечките светски инвестициски банки ги објавуваат своите прогнози за S&P 500 во 2026 – и повеќето се прилично оптимистички. За многу инвеститори тоа е изненадување, бидејќи пазарот веќе бележи раст – со макроекономска неизвесност и растечка загриженост поради прекумерните очекувања, но банките сметаат на низа фактори кои би можеле дополнително да го поттурнат референтниот берзански индекс.

Така, „морган Стенли“ предвидува дека пред ризичните класи на имот стои силна година, во услови на поволна монетарна и фискална политика, при што американските акции би требало да ги надминат останатите пазари. Тие очекуваат раст на S&P 500 до 7.800 во наредните 12 месеци, што е за 14 проценти повеќе во однос на сегашното ниво, во споредба со очекуваниот раст од, да речеме, седум проценти за јапонскиот TOPIX и четири проценти за MSCI Europe.

„Ќе има подеми и падови, но веруваме дека биковската тенденција и понатаму е на сила,“ вели Серена Танг, главен глобален стратег за различни класи на имот во Morgan Stanley.

Американските државни обврзници веројатно ќе ослабат по растот во првата половина од годината, додека доларот би можел да падне на почетокот од 2026 година, но се очекува враќање на вредноста во второто полугодие, оценуваат нивните аналитичари.

„Откако политиката и макроекономската неизвесност доминираа во поголемиот дел од 2025 година, инвестициската сцена се поместува кон поповолно опкружување – особено за ризичните средства. Компаниите и економиите веројатно ќе имаат корист од продуктивноста што ја носи вештачката интелигенција, додека глобалното забавување на инфлацијата и економскиот раст би можеле до 2027 година да се стабилизираат на одржливо ниво, со можност за дополнително забрзување,“ се наведува во извештајот на банката.

Bloomberg

„ЏП Морган“ е на слична линија и смета дека S&P 500 би можел да достигне 7.500 поени до крајот на следната година, поддржан од очекуваниот раст на заработката меѓу 13 и 15 проценти во наредните две години. Според податоците на „Факт сет“, во третиот квартал од 2025 година компаниите од индексот S&P 500 ја зголемија заработката за 13,4 проценти во однос на претходната година.

Основната прогноза на „ЏП Морган“ исто така предвидува дека Федералните резерви ќе ги намалат каматните стапки уште двапати (во декември и јануари), но доколку подобрувањето на изгледите за инфлацијата поттикне дополнителни намалувања на каматите, берзанскиот индекс, според нивната проценка, би можел да ја надмине границата од 8.000 поени.

„И покрај балонoт поврзан со вештачката интелигенција и загриженоста околу вреднувањето, гледаме дека моменталните покачени мултипликатори правилно предвидуваат раст на заработката над просекот, значително зголемување на инвестициите во вештачка интелигенција, раст на исплатите кон акционерите и поповолна фискална политика“, напишаа претставници на компанијата во белешка за клиентите објавена во вторникот.

„Понатаму, ефектите од дерегулацијата и растот на продуктивноста со помош на вештачката интелигенција и понатаму се недоволно вреднувани.“

Ова не е осамено гледиште на Волстрит, иако изгледаше дека очекувањата за растот на индустријата за вештачка интелигенција беа разнишани под притисокот од стравот за создавање балон. Според сè, расположението по тоа прашање всушност остана недопрено, па во согласност со тоа централната идеја на проекцијата на „Ејч-ес-би-си“  за 2026 година за S&P 500 исто така предвидува дека тој ќе достигне 7.500 поени до наредниот декември.

Bloomberg

„Инвестициите во вештачка интелигенција би требало и во 2026 година да продолжат да доминираат, како што се интензивира трката за вооружување со ВИ,“ напишаа во својот извештај аналитичарите на „Ејч-ес-би-си“, Никол Инуи, Аластер Пиндер и Мет Борчета, кои во документот воопшто не навлегоа во прашањето дали постои ВИ балон – нивните колеги веќе претходно оценија дека таков не постои.

Оптимизмот во врска со понатамошната вредност на американската имотна класа се среќава и од другата страна на океанот. „Дојче банк“ дури неодамна предвиде дека S&P 500 ќе порасне на 8.000 до крајот на следната година, повикувајќи се на силни корпоративни заработки и добивки поттикнати од ВИ, што ја прави оваа прогноза најоптимистичка меѓу големите светски брокерски куќи, пренесе „Ројтерс“.

Со тоа се имплицира раст од околу 20 проценти во однос на нивото што берзанскиот индекс го постигнува овие денови, со очекување дека сумата на очекуваните добивки по акција на сите компании во индексот S&P 500, пондерирана со нивната пазарна капитализација, ќе достигне 320 долари.

Економијата се криви во форма на буквата К
 

И „ЏП Морган“ и „Ејч-ес-би-си“ забележуваат дека американската економија сè повеќе добива таканаречена К-форма (ситуација во која богатите и успешни делови на економијата растат, додека посиромашните и ранливи стагнираат или заостануваат), што ги менува потрошувачките навики и довербата на потрошувачите. Аналитичарите затоа предвидуваат дека 2026 година ќе биде обележана со повнимателна потрошувачка и различни фактори кои го одржуваат таквиот облик на економијата.

„Иако инвестицискиот бран во вештачка интелигенција би требало да ја поддржи економијата, гледаме дека потрошувачот станува сè понесигурен. Инфлацијата и понатаму останува висока, пазарот на труд е нестабилен, а економските политики повеќе одат во прилог на потрошувачите од повисокиот сегмент,“ се наведува во извештајот на  „Ејч-ес-би-си“. Тие проектираат дека 2026 година ќе биде обележана со она што аналитичарите го нарекуваат „економија со двојна брзина“, каде високо платените и оние со подобар кредитен рејтинг трошат повеќе и имаат поголема доверба во економијата, додека потрошувачите со пониски приходи и послаб кредитен профил трошат помалку и се повнимателни.

За инвеститорите во акции, ваквата ситуација, според наводите на „ЏП Морган“, веројатно ќе го направи пазарното расположение променливо и склоно кон нагли осцилации, бидејќи послабата економска рамка се спротивставува на позитивните изгледи за големите компании кои би требало да профитираат од ширењето на вештачката интелигенција во различни индустрии.

„Проблемот е во тоа што технологијата на вештачка интелигенција брзо ги менува и трансформира индустриите во рамките на веќе длабоко поделена економија со К-форма, каде богатите напредуваат, а посиромашните заостануваат. Се очекува дека вештачката интелигенција дополнително ќе ги продлабочи овие разлики. Стравот и неизвесноста во врска со технологијата на вештачка интелигенција веројатно ќе опстојат уште со години,“ велат во „ЏП Морган“.

Движења во декември – „Голдман“ советува купување при пад

Bloomberg

Освен што „ЏП Морган“ изнесе очекување дека Федералните резерви во декември ќе ги намалат трошоците за задолжување, во неодамнешната прогноза на „Голдман“ повторно се нагласува потребата за намалување на каматите во последниот месец од оваа година и им се советува на инвеститорите да купуваат при пад на пазарот.

Имено, инвестициската банка кон крајот на ноември изнесе очекување дека пазарот на труд ќе покаже слабости, па ја истакна можноста за споменатото намалување на каматните стапки, имајќи предвид дека инфлацијата во земјата се смирува. Во вторник „Блумберг“ извести дека пазарните инструменти укажуваат на приближно 80 проценти шанси дека Федералните резерви на декемврискиот состанок ќе ги намалат каматите за четвртина процентен поен, „во споредба со 30 проценти пред само неколку дена“.

Кристијан Милер - Глисман, стратег за акции во „Голдман“, ги советува инвеститорите да се подготват за падови до крајот на годината, но нагласува дека тоа претставува можност за купување. Така, иако ризикот од пад на акциите порасна, аналитичарот задржува умерено про-ризична стратегија. „Со нашиот поволен макро сценарио во 2026,“ вели тој, „ние би купувале паѓања.“

„Голдман“ е оптимистичен кога станува збор за акциите во период од три и 12 месеци, додека во кредитниот сектор е повнимателен. Слично како и другите водечки банки, и тие проектираат дека акциите ќе бидат поддржани од раст на заработката, поволни потези на Федералните резерви без предизвикување рецесија и глобални фискални поттикнувања.

И нивните стратези се осврнаа на процутот на вештачката интелигенција, заклучувајќи дека, и покрај високите вреднувања, пазарот не е пренадуен. „Нашиот глобален тим за стратегија за акции смета дека акциите на ВИ компаниите не се балон,“ пренесе Милер - Глисман, истакнувајќи дека поголемиот дел од тие фирми „се профитабилни и имаат силни биланси.“