Волстрит очекува натамошен раст на индексот S&P 500, ВИ и профитите се клучни за подемот

Првата половина од 2026 година ги принуди инвеститорите неколкупати да ги менуваат своите очекувања. Пазарот истовремено се обидуваше да ги процени последиците од конфликтот на Блискиот Исток, енергетскиот шок и повторното засилување на инфлациските притисоци, додека огромните инвестиции во вештачката интелигенција продолжија да ја поддржуваат американската економија и корпоративните профити. И покрај сите овие неизвесности, американските акции го продолжија растот и достигнаа нови рекордни нивоа.

Поради тоа, главното прашање за втората половина од годината е од каде би можел да дојде следниот бран на раст и што треба да се случи за денешните високи вреднувања да бидат оправдани.

Одговорот на најголемите банки од Волстрит засега е прилично сличен. „ЏП Морган“, „Голдман“ „Морган Стенли“ и „Сити“ и понатаму имаат позитивен став кон американските акции и очекуваат индексот S&P 500 да ја заврши годината над сегашните нивоа. Сепак, зад овој оптимизам стојат очекувањата за продолжување на силниот раст на корпоративните профити, натамошни инвестиции во вештачка интелигенција и доволно отпорна американска економија.

Волстрит очекува раст, но летвичката сега е поставена многу повисоко

Најголемиот проблем за инвеститорите е тоа што американскиот пазар повеќе не се наоѓа на почетокот на циклусот на раст. Голем дел од оптимизмот поврзан со вештачката интелигенција, силните корпоративни резултати и идниот економски раст веќе е вграден во цените на акциите.

Затоа во прогнозите на најголемите банки сè почесто се појавува тезата дека следната фаза од растот ќе мора да биде оправдана со профитите на компаниите. „Голдман“ токму на тоа го темели својот позитивен поглед за остатокот од годината. Нивните стратези очекуваат растот на индексот S&P 500 да продолжи првенствено благодарение на зголемувањето на заработката на компаниите, а не затоа што инвеститорите ќе бидат подготвени да плаќаат сè повисоки цени за исто ниво на профит.

„ЏП Морган“ на сличен начин останува позитивно настроен кон акциите поради силниот моментум на корпоративните заработки, но предупредува дека добрите резултати од претходните квартали веќе ги подигнале очекувањата и со тоа им ја отежнале задачата на компаниите и понатаму позитивно да го изненадуваат пазарот.

Ова ја менува природата на актуелниот „биковски“ пазар. Кога очекувањата се ниски, доволно е резултатите да бидат само малку подобри од прогнозите за акциите силно да реагираат. Но кога летвичката е веќе поставена високо, како што е случајот во моменталните пазарни услови, инвеститорите бараат сè повеќе докази дека растот може да продолжи и во иднина.

ВИ останува мотор на пазарот, но станува и негов тест

Depositphotos

Најважниот дел од оваа приказна и понатаму е вештачката интелигенција. Таа сега станува широко распространета тема што навлегува во речиси сите аспекти на животот. Огромните инвестиции во центри за податоци, чипови, енергетска инфраструктура и друга опрема станаа важен дел од американскиот инвестициски циклус, а „ЏП Морган“ токму капиталните инвестиции поврзани со ВИ ги гледа како еден од клучните двигатели на економскиот раст во втората половина од годината.

„Голдман“ оди чекор понатаму и очекува компаниите што директно имаат корист од изградбата на ВИ инфраструктурата да генерираат приближно половина од овогодишниот раст на заработката на компаниите од индексот S&P 500. И „Морган Стенли“гледа на силниот инвестициски циклус во ВИ како на една од главните причини поради кои американските акции би можеле да продолжат да ги предводат светските пазари.

Сепак, токму она што го поддржува пазарот истовремено го зголемува и ризикот. Во изминатите години инвеститорите ги наградуваа компаниите што ги зголемуваа вложувањата во ВИ, но сега сè повеќе сакаат да видат какви конкретни резултати носат тие инвестиции. Затоа фокусот постепено се префрла кон прашањата колкави приходи, продуктивност и профит ќе произлезат од оваа потрошувачка.

„Голдман“ предупредува дека понатамошниот раст на заработката сè повеќе ќе зависи од способноста на најголемите технолошки компании да остварат доволно високи приноси од своите инвестиции во ВИ, додека „ЏП Морган“ укажува и на големата концентрација на инвеститорскиот капитал во најпопуларните сегменти на пазарот.

Следната фаза од растот можеби нема да им припадне само на технолошките гиганти

Сепак, една од попозитивните промени што дел од Волстрит ја очекува е пошироко распространување на растот кон остатокот од пазарот.
 

 

 

„Сити груп“ смета дека веќе се појавуваат знаци дека растот повеќе не е ограничен само на првичните добитници од револуцијата на вештачката интелигенција. Подобрувањето на економските показатели и проширувањето на позитивните ревизии на корпоративните заработки би можеле да отворат простор за поголем број сектори и компании да учествуваат во растот.

Ова е особено важно по периодот во кој голем дел од приносите на американските берзански индекси зависеа од релативно мал број компании со огромна пазарна капитализација. Доколку растот на профитите почне да се шири и кон индустријата, финансискиот сектор и другите циклични сегменти на пазарот, продолжувањето на биковскиот тренд би добило значително поздрава основа.

„Морган Стенли“ веќе ги издвојува индустријата, финансискиот и потрошувачкиот сектор меѓу своите преферирани сегменти на американскиот пазар, покрај најголемите компании поврзани со инфраструктурата за вештачка интелигенција.

Фед е местото каде консензусот почнува да пука

Додека банките главно се согласуваат дека американските акции сè уште имаат простор за раст, сликата околу монетарната политика не е толку јасна. „ЏП Морган“ очекува инфлацијата да остане проблем и дека Федералните резерви (Фед) до крајот на годината ќе ги задржат каматните стапки непроменети. „Сити груп“ е пооптимистички настроен кога станува збор за инфлацијата и очекува следниот потег на американската централна банка да биде намалување, а не зголемување на каматните стапки.

Оваа разлика е важна бидејќи укажува на една од најголемите непознати за пазарот во наредните месеци.

Најповолното сценарио за Волстрит би било постепено смирување на инфлацијата, проследено со доволно силен економски раст. Во такво опкружување монетарната политика би можела да стане поповолна, без притоа да дојде до слабеење на корпоративните профити.

Што може да ги расипе сметките на Волстрит?

И покрај генерално позитивните прогнози, речиси секое оптимистичко сценарио на големите банки се темели на неколку претпоставки кои мора истовремено да се остварат.

Еден од најголемите ризици повторно е инфлацијата. „Морган Стенли“ како главен ризик за својот позитивен поглед кон пазарот го наведува токму новото забрзување на растот на цените, кое би можело да го принуди Фед да води порестриктивна монетарна политика. И „ЏП Морган“ предупредува на упорно висока инфлација, додека енергетскиот шок и развојот на ситуацијата на Блискиот Исток остануваат важни непознати фактори.

 

 

Вториот ризик доаѓа од самиот пазар. По силниот раст, очекувањата од компаниите се високи, а „Голдман“ предупредува и на тесната пазарна широчина и силниот моментум, кои историски гледано можат да бидат сигнал за зголемен ризик.

Третиот ризик е поврзан со вештачката интелигенција. Доколку се покаже дека стотиците милијарди долари инвестиции не го создаваат очекуваниот раст на продуктивноста и профитабилноста, проблемот нема да биде ограничен само на неколку технолошки компании. Инвестицискиот циклус поврзан со ВИ стана доволно голем за денес да влијае врз производителите на чипови, индустрискиот сектор, енергетиката, кредитниот пазар и врз самата американска економија.

Оптимистички, но не без причина за внимателност

„ЏП Морган“ смета на отпорен економски раст и продолжување на инвестицискиот циклус поврзан со вештачката интелигенција. „Голдман“ очекува дека корпоративните профити и понатаму ќе го оправдуваат растот на пазарот. „Ситигруп“ гледа можност тој раст да се прошири на поголем број компании, додека „Морган Стенли“ останува позитивно настроен кон американските акции, но предупредува дека враќањето на посилна инфлација би можело да ја промени моменталната пресметка.

Затоа заедничката порака од Волстрит е дека пазарот веќе достигна доволно високи нивоа и дека натамошниот раст ќе мора од квартал во квартал да добива сè посилна потврда преку реалните деловни резултати. Доколку корпоративните профити продолжат да растат, инвестициите во вештачката интелигенција сè појасно се претвораат во конкретни приходи, а инфлацијата остане доволно контролирана за Федералните резерви (Фед) да немаат потреба повторно да ја заоструваат монетарната политика, американските акции ќе имаат простор да го продолжат силниот нагорен тренд.