„Насдак“ бара одобрение од Комисијата за хартии од вредност на САД за 23-часовно тргување

„Насдак“ (Nasdaq Inc.), втората најголема берза во САД, бара регулаторно одобрение за продолжување на трговските часови на своите берзански платформи на 23 часа во текот на работната недела.

Компанијата побара од Комисијата за хартии од вредност на САД дозвола да воведе дополнителна трговска сесија, од 21 до 4 часот по источно време, се наведува во документацијата доставена во понеделникот. Со тоа би се дополниле претпазарните, редовните и постпазарните часови на тргување што компанијата веќе ги има.

„Оваа еволуција одразува една едноставна реалност: глобалните инвеститори очекуваат пристап според нивните услови, во нивните временски зони, без да се наруши довербата или интегритетот на пазарот“, изјави Чак Мак, потпретседател за пазарите во Северна Америка во „Насдак“.

Берзата им се приклучува на своите конкуренти во укажувањето на растечкиот интерес за тргување со американски акции надвор од традиционалните пазарни часови, кои траат од 9:30 до 16 часот по источно време. Учесниците на пазарите надвор од редовното тргување во САД ја поздравија можноста за побрзо вградување на информациите за деловните резултати и макроекономските случувања во цените, но истовремено предупредија дека речиси континуираното тргување ќе им остави помалку време на инвеститорите да ги обработат вестите по затворањето на пазарите и може да доведе до поизразени ценовни осцилации во периоди со слаба ликвидност.

Претходно годинава „Насдак“ објави дека планира да понуди дополнителни часови за тргување на својата берза за акции, настојувајќи да ја искористи растечката глобална побарувачка за американски акции. Компанијата очекува да биде подготвена за продолжено тргување на почетокот на третиот квартал од 2026 година, под услов да добие регулаторно одобрение и да се усогласи со остатокот од индустријата.

Потегот на „Насдак“ е апсолутна пресвртница, изјави Дилин Ву, стратег за истражувања во „Пеперстоун“ (Pepperstone Group) во Австралија.

„Тоа практично ги носи американските акции во нашите локални часови на тргување, ја зголемува ликвидноста и им овозможува на инвеститорите тука да реагираат во реално време наместо да чекаат ноќни сесии. За сите што се активни во технолошкиот сектор или во американските акции со висок бета-коефициент, ова е значаен чекор кон навистина глобален пазар.“

И другите берзи ги најавија своите планови за продолжување на трговските часови, меѓу кои и Њујоршката берза, која планира да понуди тргување 22 часа во работните денови. Предлогот доби првично одобрение од Комисијата за хартии од вредност на САД во февруари, под услов да се ажурира пазарниот систем за дистрибуција на податоци.

За ова да стане реалност, клучните чинители, меѓу кои и ДТЦЦ (Depository Trust & Clearing Corp.), која го спроведува порамнувањето на трансакциите, како и оперативните комитети на процесорите за информации за хартии од вредност, кои прикажуваат цени во реално време, ќе треба исто така да ги продолжат своите работни часови. Двете организации ги доставија своите планови, при што ДТЦЦ соопшти дека планира да започне со порамнување на тргувањето со акции 24 часа дневно, пет дена во неделата, до вториот квартал од 2026 година.

Овој развој би можел да биде привлечен за повеќе мали инвеститори на различни пазари низ светот, изјави Кери Крег, глобален пазарен стратег во „ЏП Морган“ (JPMorgan Asset Management) во Мелбурн.

Продолжените часови за тргување станаа почести за време на пандемијата, овозможувајќи им на инвеститорите веднаш да реагираат на настани што го движат пазарот. Компании како „Робинхуд маркетс“ (Robinhood Markets Inc.) и „Интерактив брокерс“ (Interactive Brokers Group Inc.) почнаа да им овозможуваат на клиентите купување и продажба на американски акции 24 часа дневно, пет дена во неделата, преку алтернативни платформи надвор од берзата, како што е системот за алтернативно тргување на „Блу оушн“ (Blue Ocean).

Платформите што овозможуваат продолжено тргување со акции го поделија Волстрит. Поддржувачите велат дека инвеститорите, и во САД и во странство, сакаат можност да пристапуваат и да реагираат на акциите надвор од редовните часови на американските пазари. Противниците, пак, предупредуваат дека квалитетот на тргувањето може да трпи поради понискиот обем, што може да ја направи ценовната формација помалку прецизна.

Најголемиот дел од трговската активност и понатаму се одвива околу познатото ѕвонче што ги означува почетокот и крајот на трговскиот ден на најголемите берзи на американските пазари. Со воведувањето дополнителни часови, останува отворено прашањето дали институционалните трговци ќе почнат да тргуваат и надвор од тие периоди, кога обемот е поголем.

„Вистинскиот тест е длабочината на ликвидноста“, изјави Хебе Чен, аналитичарка во „Вантиџ маркетс“ (Vantage Markets) во Мелбурн.

„Доколку се вклучат и институционалните инвеститори, тоа е јасна победа за инвеститорите со седиште во Азија, ако не, продолжените часови може да се покажат како побучни, наместо поефикасни.“