Рекордното тргување на Волстрит ги засени европските банки

Откако УБС (UBS Group AG) објави дека нејзините трговци со акции оствариле 53 отсто поголеми приходи отколку пред една година, надминувајќи 2,3 милијарди долари втор квартал по ред, Стефан Шталман, аналитичар во „Аутономус рисрч“ (Autonomous Research) ја пофали банката, но со една забелешка.

„Сакав да почнам со вашите многу силни резултати во тргувањето со акции“, рече тој за време на конференцискиот повик посветен на резултатите за вториот квартал. „Не се баш на нивото на американските банки, но се подобри од европските конкуренти што досега ги објавија резултатите.“

За најголемите европски банки повеќе не е доволно да ги придобијат инвеститорите и аналитичарите само со двоцифрен раст на приходите. Банките со големи операции за тргување мора да докажат дека можат да им конкурираат на најголемите банки од Волстрит, од кои многу поставија рекорди по приходи во вториот квартал.

Во вторникот „Берклис“ (Barclays Plc) објави приходи од инвестициското банкарство што беа повисоки од очекувањата на аналитичарите. Но растот од 45 отсто на приходите од тргување со акции не беше доволен да ги воодушеви инвеститорите или да ги засени помалите потфрлања во другите сегменти од работењето на британската банка. Акциите паднаа за речиси пет отсто.

Многу банки од Волстрит, меѓу кои „ЏП Морган“ (JPMorgan Chase & Co.) и „Голдман Сакс“ (Goldman Sachs Group Inc.), соопштија дека периодот од април до јуни бил рекорден за нив, благодарение на нестабилноста на пазарите на акции. Клиентите постојано ги приспособуваа своите портфолија додека траеше војната меѓу САД и Иран, а акциите на компаниите поврзани со вештачката интелигенција бележеа силен раст. Кај „Голдман Сакс“, нето-приходите од тргување со акции достигнаа 7,42 милијарди долари, што е 72 отсто повеќе отколку во вториот квартал од 2025 година.

Тоа постави повисока летвичка за европските инвестициски банки. „Дојче банк“ (Deutsche Bank AG) во средата соопшти дека нејзините трговци со инструменти со фиксен принос оствариле приходи од 2,6 милијарди евра (три милијарди долари) во текот на периодот, што е за 16 отсто повеќе отколку пред една година. Тој раст го надмина просекот од 13 отсто што го пријавија американските конкуренти. Акциите на германскиот банкарски гигант пораснаа дури за шест отсто.

Европските инвестициски банки заостануваат зад американските конкуренти според повеќето показатели

Во просек, американските компании остварија подобри резултати во вториот квартал

Забелешка: Податоците за советодавните услуги и пазарите на капитал на „БНП Париба“ не се достапни, а „Дојче банк“ (Deutsche Bank) се повлече од тргувањето со акции во 2019 година/Company filings

„Дојче банк“ се спротивстави на поширокиот тренд и покажа силни резултати во сегментот ФИКК“, напиша во белешка во средата Џозеф Дикерсон, аналитичар во „Џеферис“ (Jefferies Financial Group Inc.).

Но, во некои случаи, ниту силните резултати од тргувањето не беа доволни за да ги поттикнат инвеститорите да ги купуваат акциите.

За „БНП Париба“, аналитичарите од „Дојче банк“ и „Блумберг интелиџенс“ (Bloomberg Intelligence) уште пред објавувањето на резултатите оценија дека банката е добро позиционирана да профитира од нестабилноста на пазарите, особено поради големината на нејзиниот бизнис со тргување со акции.

Приходите на „БНП Париба“ од тргување со акции се зголемија за 43 отсто во вториот квартал, на 1,4 милијарда евра, иако акциите на банката паднаа за повеќе од три отсто на 23 јули, кога беа објавени резултатите. Банката соопшти дека морала да издвои повеќе средства за потенцијални лоши кредити отколку што очекуваа аналитичарите за тој период.

Кај „Берклис“, некои аналитичари брзо посочија дека приходите од инвестициското банкарство, иако ги надминаа просечните очекувања на аналитичарите, не беа на нивото на американските банки.

„Би тврделе дека очекувањата на пазарот веќе се поместија нагоре по објавувањето на резултатите на американските банки“, напиша во белешка за „Берклис“ Ендрју Кумбс, аналитичар во „Ситигруп“ (Citigroup Inc.), сугерирајќи дека пазарниот консензус можеби бил повисок.

Бенџамин Томс, аналитичар во РБЦ (RBC Capital Markets), истакна дека „Берклис“ имал „послаби резултати од американските конкуренти“ во инвестициското банкарство.

Европските и британските банки исто така се натпреваруваат во проширувањето на своите оддели за примарно брокерство, кои им одобруваат заеми на хеџ-фондовите за да им помогнат при извршувањето на трансакциите, што придонесува за раст на приходите од тргување со акции.

Финансиската единица на УБС, во која е сместен тој бизнис, забележа раст на приходите од 40 отсто во кварталот, според соопштението на банката. „Берклис“ соопшти дека растот на приходите од тргување со акции во вториот квартал бил поттикнат токму од примарното финансирање.

Но, и во тој сегмент, европските банки ќе мора да се соочат со моќната конкуренција од Волстрит.

Кај „Голдман Сакс“, на пример, дел од приходите од тргување со акции биле поттикнати од примарното финансирање. Салдата во одделот за примарно брокерство на „Ситигруп“ се зголемиле за 60 отсто во однос на претходната година. Американската банка планира во 2026 година да го зголеми бројот на вработени во својот оддел за примарно брокерство во регионот Азија-Пацифик за околу 10 отсто, а до 2028 година има цел вкупните салда во примарното брокерство да надминат 700 милијарди долари.

- Со придонес од Николас Комфорт и Џеф Блек.