„ЏП Морган“ и „Велс Фарго“ претпазливи во однос на американските акции

„Велс Фарго“ (Wells Fargo & Co.) е втората банка од Волстрит што стана претпазлива во однос на американските акции оваа недела, бидејќи пазарот се ближи кон она што е за акциите историски најлошиот месец во календарот, а претстојните избори за Конгресот ја зголемуваат неизвесноста околу трговијата со акции на компании поврзани со вештачката интелигенција (ВИ).

Аналитичарите на банката, предводени од Осунг Квон, главен стратег за акции на фирмата, предупредуваат на „широка претпазливост“ влегувајќи во септември, бидејќи вложувачите стануваат сè позагрижени за одржливоста на бумот на инвестициите во ВИ. Тимот очекува стравот околу капиталните расходи поврзани со ВИ проектите да достигне кулминација. Сепак, тие забележуваат дека нивниот индикатор за расположение останува повеќе позитивен отколку негативен по распродажбата во средината на август.

Тимот на Квон не беше единствениот што се сврте кон повнимателна опсервација на американските акции оваа недела. Брокерскиот оддел на „ЏП Морган“ (JPMorgan Chase & Co.), предводен од глобалниот шеф на секторот за пазарни анализи, Ендрју Тајлер, во понеделник се префрли на „тактички претпазлив“ поглед на акциите во следните неколку недели откако остриот став на претседателот на Федералните резерви, Кевин Ворш, ги натера пазарите да ги зголемат облозите за зголемување на каматните стапки оваа година.

 

Септември е историски најлошиот месец за S&P 500

Bloomberg Mercury

 

 

Иако S&P 500 се спротивстави на сезонскиот тренд во последните две години, индексот има губено просечно по 0,8 отсто во септември во текот на последните три децении, покажуваат податоците собрани од Блумберг.

Аналитичарите на „Велс Фарго“ се поколебани од загриженоста за прекумерните инвестиции во ВИ, како и од ризикот од повеќе мораториуми на изградбата на податочните центри додека земјата се движи кон изборите во ноември.

„Побарувачката за вештачка интелигенција ќе продолжи да се забрзува, но економијата/капиталот ќе биде ограничување“, напиша Квон во белешка до клиентите во вторник. „Гледаме ризик дека циклусот на капитални трошоци за ВИ ќе влезе во својата доцна фаза во 2027 година, освен ако економијата не забрза доволно за да оправда понатамошни инвестиции. Се очекува стапката на раст да достигне врв следниот квартал.“

Акциите на компаниите за чипови, вклучувајќи ги „Енвидија“ (Nvidia Corp.), „АМД“ (Advanced Micro Devices Inc.) и „Интел“ (Intel Corp.), како и таканаречената група „Седум величествени“, меѓу кои „Амазон“ (Amazon.com Inc.) и „Тесла“ (Tesla Inc.), се тргуваат пониско во вторник, потфрлајќи поради поопштата слабост на пазарот.

Индексот на компаниите за чипови, Philadelphia Semiconductor Index падна за 1,4 отсто до 11:50 часот наутро во Њујорк, допирајќи го најниското интрадневно ниво од трети август. Индексот се мачи да ги надомести загубите со кои се соочи за време на распродажбата од средината на јуни до јули, испраќајќи предупредувачки сигнал за техничките стратези.

Поднесувањето на пријавата од страна на „Антропик“ (Anthropic PBC) за претстојната иницијална јавна понуда (ИПО) ќе биде „најважниот катализатор на краток рок“, рече Квон. Тој предлага поседување квалитетни акции наместо бета (‘beta’ е број што мери колку цената на акцијата отстапува нагоре или надолу во однос на остатокот од пазарот, н.з.), со акцент на софтвер наместо чипови - освен ако бројките на „Антропик“ не се толку па да ја валидираат трговијата со ВИ акции и тогаш спротивната стратегија има повеќе смисла.

На долг рок, Квон проценува дека потребниот бруто аутпут од ВИ треба да достигне 1,4 билиони долари до 2028 година и 2,2 билиони долари до 2029 година за да се оправдаат масовните инвестициски планови. И тоа ова сето додека аналитичарите секојдневно се сведоци дека мораториумите на изградбата на  податочни центри добиваат на интензитет, со очекувани повеќе паузи пред изборите за Конгресот во ноември.

-Со помош на Мет Тарнер