Групата „Андерсен“ (Andersen), даночна и советодавна компанија што беше основана од страна на поранешни вработени по падот на ревизорската куќа „Артур Андерсен“ (Arthur Andersen) по аферата со „Енрон“ (Enron), во средата ја изврши успешно првата јавна понуда (ИПО).
Акциите на „Андерсен“ сега котираат на Њујоршката берза под кратенката ANDG, откако компанијата во првата јавна понуда на акции собра 176 милиони долари. Акциите по дебито скокнаа за речиси 50 проценти.
Акцијата го заврши тргувањето на цена од 23,50 долари, што е 47 проценти повисоко од цената на издавање од 16 долари, при што компанијата постигна пазарна капитализација од околу 2,6 милијарди долари. Компанијата продаде 11 милиони акции по цена што се движеше од 14 до 16 долари по акција, а понудата привлече побарувачка од инвеститори што била приближно 10 пати поголема од бројот на достапните акции, известува „Блумберг“ (Bloomberg).
ИПО на групата „Андерсен“ според извештаите на весникот „Фајненшл тајмс“ е тест за интересот на инвеститорите пред можниот бран јавни понуди на акции на компании од областа на ревизијата. Јавната понуда на „Андерсен“ беше водена од банките „Морган Стенли“ (Morgan Stanley) и УБС (UBS).
„Денес е историски ден за ‘Андерсен’“, изјави по ИПО извршниот директор на групата Марк Ворсац.
Како работи „Андерсен“
Групата нуди независни даночни, проценувачки и финансиски советодавни услуги за физички лица и фамилијарни канцеларии, компании и фондови, главно во странство. Во 2002 година групата беше основана од даночниот партнер Марк Ворсац со поранешни соработници од „Артур Андерсен“. Истата година „Артур Андерсен“ пропадна по скандалот со „Енрон“, кој беше еден од нивните најважни ревизорски клиенти. По позитивните истражувања на пазарот, групата во 2014 година ја презеде марката „Андерсен“.
Ворсац за изјави за „Фајненшл тајмс“ дека влезот на берзата ќе му овозможи на „Андерсен“ да има „валута“ во форма на акции за преземање поврзани компании низ светот, вклучувајќи и такви што биле основани од други поранешни вработени во „Артур Андерсен“.
Групата „Андерсен“ во САД - чии седишта се во Сан Франциско - има повеќе од 2.200 вработени и е дел од „Андерсен глобал“ (Andersen Global), швајцарско здружение на правно одвоени компании низ светот, кое се состои од повеќе од 300 членки и партнерски компании, според „Блумберг“.
Во првите девет месеци од годината групата генерирала приходи од 668,3 милиони долари и чиста добивка од 65,7 милиони долари. Добивката е намалена за 55 проценти во споредба со истиот период минатата година (од 144,5 милиони долари), додека приходите пораснале за 13 проценти (од 589,2 милиони долари).
.webp){kind=icon}
