.webp){kind=icon}
Побарувачката за криптовалути како средство за плаќање драстично опадна во последните шест месеци, вели Такис Георгакопулос, глобален шеф на секторот за плаќања во JPMorgan Chase.
„Гледавме голема побарувачка од нашите клиенти до пред, отприлика, шест месеци“, кажа Георгакопулос во интервју за телевизијата Bloomberg. „Во моментот такво нешто гледаме многу малку“, посочи тој, но додаде дека банката ќе продолжи да ги поддржува клиентите кои сакаат да го користат таквиот начин на плаќање.
Криптовалутите минуваат низ пад што збриша околу две илјади милијарди долари пазарна вредност за помалку од една година и се соочуваат со намален обем на многу берзи. Некои од водечките компании кои се занимаваат со дигитални средства се турнати во стечај.
Прочитај повеќе
Трговците со крипто гледаат излез по двегодишниот минимум со тргување
Минатата недела се истргуваа само 5,4 отсто од биткоините, што е најмалку во последните две години
06.09.2022
Сепак, JPMorgan полага надежи во растот на токенизираните средства и сè повеќе го прифаќа секторот со текот на годините. Неодамна стана еден од клучните поддржувачи на лондонскиот стартап Ownera кој се бави со дигитални средства, а во мај експериментираше со користење на блокчејн за колатерални порамнувања.
Криптовалутите, исто така, стануваат сè поголеми во секторот за игри, рече Георгакопулос. Ова се однесува и на традиционалниот гејминг и на метаверзумот, каде што има многу нови можности, додаде тој.
Фирмите како Block, која ја предводи Џек Дорси, се меѓу лидерите кои го прифаќаат потенцијалот на криптовалутите како средство за плаќање и покрај нестабилноста на дигиталните токени. Последните квартални резултати на Block покажаа дека приходите собрани преку трансакции со биткоин паднале за 34 отсто на 1,79 милијарди долари.
