Американската мултинационална корпорација за вршење платни налози и финансиски услуги Виза (Visa) склучи партнерство со менувачницата за криптовалути „FTX“. За големината на Виза доволно говори фактот што во 2021 година оствари приходи во износ од 24,11 милијарди американски долари, а компанијата има околу 22.000 вработени. Наспроти Виза, ја имаме „FTX“ крипто менувачницата, која што почетните приходи од 89 милиони американски долари минатата година ги доведе до 1,02 милијарди американски долари, што претставува пораст на приходите до скоро 1.000 проценти. Кратко по објавата на оваа вест цената на токенот „FTX“ скокна за 7 отсто.
Оваа вест доаѓа по падот на цената на биткоинот и другите криптовалути, како и по официјалниот почеток на забавувањето на пазарот. Потегот на Виза во овој момент сугерира дека корпорацијата сепак смета дека крипто инвеститорите сакаат и натаму да ги трошат своите дигитални валути и покрај падот на цената на токените и состојбата на пазарот.
Конкретно, што се однесува до соработката, Виза ќе овозможи користење на дебитните картички во 40 држави со акцент на Латинска Америка, Азија и Европа. Картичките кои што веќе се достапни во Соединетите Американски Држави ќе овозможат еднакво поврзување на корисниците со средствата што ги имаат во паричниците од „FTX“ крипто менувачницата. На овој начин тие ќе може да ги трошат своите дигитални пари без провизија и ги префрлаат средствата од сметка на сметка. Со тоа Виза ќе им овозможи на своите корисници плаќање на производи и услуги со дигиталните валути и тоа на повеќе од 80 милиони продажни места ширум светот кои што ги поддржуваат Виза картички.
„Во Виза веруваме дека дигиталните валути имаат трајно влијание на иднината на финансиските услуги и движењата на парите“, рече Куи Шефилд, директор на Виза за крипто секторот.
Оваа година е одбележана со влез на многу финансиски корпорации во светот на криптовалутите. Истакнуваме дека веќе е договорена сорааботката на Виза со менувачниците за криптовалути „Coinbase“ и „Binance“, додека најголемиот ривал на Виза, Мастеркард (Mastercard) има слични планови. Друг конкурент од оваа бранша, Американ Експрес (American Express), има малку поинаков став. Имено, генералниот извршен директор на Американ Експрес, Стефан Скуери, претходно изјави дека за сега немаат намера да ги поврзат платежните картички со крипто менувачниците.
Одреден апсурд што се појавува околу оваа ситуација и соработката меѓу двете корпорации лежи во самата криптовалута. Како што знаеме, првичната намена и целта на криптовалутата беше да се заобиколат банките и посредниците. Сепак, во последно време поголемиот дел од банките ги прифаќаат блокчејн технологиите и начинот на плаќање со дигитални валути, што сепак на крајот доведе до соработка меѓу овие два различни света.
.webp){kind=icon}
