text size
„Коинбејс глобал“ (Coinbase Global Inc.), најголемата американска берза за криптовалути, забележа загуба од 557 милиони долари и пад на приходите од 75 отсто во четвртиот квартал, бидејќи обемот на тргување опадна поради серија банкроти и скандали во индустријата.
Иако приходите од 629 милиони долари за кварталот беа повисоки од просечните процени на аналитичарите од 581 милион долари, тоа е само четвртина од 2,5 милијарди долари регистрирани во претходниот период. При загуба од 2,46 долари по акција, нето-приходот беше 840 милиони долари, или 3,32 долари по акција, соопшти компанијата во вторникот. Обемот на трговската размена не го достигна очекуваното ниво. Компанијата очекува приходите од претплати и услуги во првиот квартал да бидат помеѓу 300 и 325 милиони долари.
Загубата беше четврта по ред за „Коинбејс“, која се бореше со дивите флуктуирачки цени на криптовалутите. Компанијата отпушти 20 отсто од својот персонал во јануари, откако веќе отпушти 18 отсто во јуни минатата година. „Коинбејс“ во писмо до инвеститорите во вторникот порача дека 2023 година ќе биде „година на регулаторен фокус и веруваме дека нашите силни основи ќе нè направат победник во оваа нова средина“. „Коинбејс“ соопшти дека работи на подобрување на приспособената ЕБИТДА (EBITDA), мерка за профитабилност пред камата, даноци, амортизација.
Брајан Армстронг, извршен директор на „Коинбејс“, за време на извештајот за заработка рече дека компанијата еволуирала за да генерира приспособена ЕБИТДА во сите пазарни услови, наместо да работи со цел да минува низ циклусите финансиски останувајќи на нула.
Во едно претходно интервју, финансиската директорка Алесија Хас не ја исклучи можноста за дополнителни отпуштања за подобрување на финансиските резултати. Компанијата исто така не очекува значително зголемување на бројот на вработени, кој се очекува да биде околу 3.650 лица.
Иако „Коинбејс“ забележа раст на обемот на тргување - при што таксите за тргување се столбот на неговиот бизнис - во последниве недели, како што се зголемија цените на криптовалутите, се соочи со зголемена неизвесност. Неколку од неговите понови бизниси, вклучувајќи ја и заработката од стејблкоини и криптозалагањето (каде што корисниците заработуваат приноси од криптодепозити), би можеле да се соочат со владина контрола, по неодамнешните регулаторни активности преземени против ривалите.
Компанијата сугерираше дека може да размисли за некои правни чекори доколку регулаторите утврдат дека криптовалутата на нејзината платформа всушност спаѓа во категоријата хартии од вредност, според годишниот извештај објавен во вторникот.
Пол Гревал, главен правен директор на „Коинбејс“, зборуваше за предизвиците за регистрирање криптопроизводи кај Комисијата за хартии од вредност на САД.
„’Коинбејс’ е доста отворен и посакува да најде пат до регистрација онаму каде што е таа достапна“, рече Гревал за време на извештајот за заработка. „Мислам дека е фер да се каже дека во овој момент, патот до регистрирање на производи и услуги што се квалификуваат како хартии од вредност не е отворен или барем достапен. Значи, се покажа дека тоа е предизвик“.
Bloomberg
Компанијата исто така губи удел на пазарот, кој падна од 5,9 отсто во ноември на 4,1 отсто во февруари, според „Криптокомпер“ (CryptoCompare). Најголемата светска криптоберза „Бајненс“ (Binance) го зголеми својот удел, достигнувајќи речиси 60 отсто во февруари. „Коинбејс“ во писмо до инвеститорите соопшти дека го зголемил уделот на пазарот во четвртиот квартал.
Средствата на платформата паднаа на 80 милијарди долари, што е за 71 отсто помалку од пред една година. „На крајот, тоа е брокерска фирма, а ако немате имот, немате ни бизнис“, изјави Дејвид Трејнер од „Њу конструктс“ (New Constructs) за ТВ Блумберг.
Акциите на „Коинбејс“ (Coinbase) годинава се зголемија за околу 75 отсто досег, бидејќи зголемувањето на цените на криптовалутите го зголеми обемот на тргување. Тие флуктуираа по објавувањето на резултатите за четвртиот квартал, а лани паднаа за 85 отсто.
„Очекувам акциите да се тргуваат позитивно со охрабрувачки изгледи, поттикнати од ограничувањето на трошоците и подобрувањето на трендот на приходите“, наведе Овен Лау, аналитичар во „Опенхајмер“ (Oppenheimer & Co).
.webp){kind=icon}
