Тимот за дигитални средства во Голдман Сакс (Goldman Sachs Group Inc.) укажа дека е отворен за зајакнување на работната сила и го истакна потенцијалот на блокчејн-технологијата за подобрување на функционирањето на пазарите како што е пазарот на приватен капитал.
Шефот на тимот Метју Мекдермот во интервју посочи дека банката и натаму овозможува голема поддршка во истражувањата на апликации базирани на блокчејн и дека одделот за дигитални средства годинава ќе вработува по потреба.
Мекдермот минатата недела зборуваше во Хонгконг, откако градот ја искористи платформата за токенизација на Голдман, ГС ДАП (GS DAP), за да продава дигитални зелени обврзници. Нивниот тим сега има околу 70 члена во споредба со четири члена во 2020 година.
Голдман минатиот месец започна еден од најголемите кругови на кратења на работните места досега, отпуштајќи околу 3.200 вработени. Криптосекторот исто така се соочува со илјадници отпуштања по падот на пазарната вредност од 1,5 билион долари во 2022 година и имплозијата на берзата FTX. Иако цените на криптото неодамна се стабилизираа, вработувањето во овој сектор останува исклучок, а не правило.
ГС ДАП е приватен блокчејн, а не јавен како оној на „Етерум“ (Ethereum). Хонгконг го искористи за да продаде токенизирани зелени обврзници во вредност од 800 милиони хонгконшки долари (102 милиони американски), скратувајќи го процесот на порамнување на еден ден по трговијата, наместо на пет.
Мекдермот вели дека очекува ГС ДАП да се користи и за други средства, како што се единици на одредени фондови, деривати и приватен капитал. „Порамнувањето, одредувањето на цените на акциите и првичните јавни понуди се веќе доволно ефикасни“, додаде тој.
„Блокчејн-платформата им овозможува на инвеститорите да видат повеќе податоци, да имаат поголема транспарентност, попрецизно одредување цени за средствата, што потоа ќе поттикне поголема ликвидност и се надеваме дека ќе донесе повеќе инвеститори на секундарниот пазар“, рече Мекдермот.
Токенизацијата долго време се сметаше како потенцијално клучна карактеристика на дигиталните книги (т.н. леџери). Поддржувачите тврдат дека тоа може да ги олесни купувањето и продавањето неликвидни средства, како што е приватниот капитал, и дека инвестиции како обврзниците побрзо се намируваат.
Но напредокот беше релативно бавен и недовербата кон крипто генерално се зголеми по колапсот на FTX и низа други скандали.
„Пренесувањето големи финансиски трансакции на јавни блокчејнови веројатно е со години далеку поради регулаторните сомнежи за безбедноста на таквите мрежи“, нагласи Мекдермот.
.webp){kind=icon}