text size
Биткоинот се движи околу својот едногодишен максимум додека менаџерот на средства „Фиделити“ (Fidelity), наводно, ја подготвува својата пријава за фонд со кој се тргува на берза (ETF) со цел спот тргување во секторот за дигитални средства.
Највредната криптовалута во светот се тргуваше по 30.407 долари во средата во 7.21 часот, откако претходниот ден достигна 30.977 долари, приближувајќи се до едногодишниот максимум од 31.411 долари (ниво забележано на 23 јуни).
Порастот дојде бидејќи се очекува „Фиделити“ да поднесе барање за спот биткоин ETF, според извештајот на порталот за криптотргување „Блок“ (The Block), кој цитира неименуван извор.
Прочитајте повеќе: Биткоинот на шестнеделен максимум, титани се пробиваат во криптосферата
„Вистински спот ETF ќе ја отвори вратата за нови текови на пари, што ќе поттикне ефект на прелевање на поширок опсег корисници во однос на обемот и интересот“, вели Дариус Табатабаи, коосновач на децентрализираната берза „Вертекс протокол“ (Vertex Protocol).
Ова е втор обид на „Фиделити“ да лансира биткоин ETF. Комисијата за хартии од вредност на САД претходно ја отфрли апликацијата на компанијата за „Вајз ориџин“ (Wise Origin Bitcoin Trust 2022).
Портпаролката на „Фиделити“, Меган Џоумас, одби да коментира.
Гигантот за управување со средства „Блекрок“ (BlackRock Inc.) ја поднесе својата апликација за спот биткоин ETF на 15 јуни, потег што минатата недела го лансира биткоинот до ново највисоко ниво годинава. Според податоците на „Блумберг интелиџенс“, од минатата недела имало околу 30 обиди за спот биткоин-производи.
Производите за инвестирање во дигитални средства ги забележаа своите најголеми неделни приливи во речиси една година, забележувајќи добивка од 199 милиони долари минатата седмица, бидејќи напливот на апликации за спот биткоин ETF во САД повторно го разгоре интересот во секторот, по судирот меѓу компаниите и американските регулатори.
„Барањето на 'Фиделити' за биткоин ETF, во услови на актуелниот период на регулаторна контрола, ја носи потребната позитивна перспектива, која очајно ѝ требаше на криптоиндустријата“, рече Хајиме Бајеза, основач на крипто хеџ-фондот АНБ (ANB Investments). „И покрај регулаторните предизвици во САД, потезите на врвните традиционални финансиски институции, како што се 'Блекрок' и 'Фиделити', значат дека институционалниот интерес и учество остануваат, вшприцувајќи кредибилитет и потенцијална стабилност на пазарот“.
.webp){kind=icon}
