Сем Банкмен-Фрид често зборуваше за својата вреќеста фотелја на која спиел во канцеларија. Помалку зборуваше за дремките во својот приватен авион.
Во месеците откако Банкмен-Фрид беше обвинет за водење огромна криптоизмама, американските обвинители и легии новинари почнаа да го анализираат секој негов збор (и дело) за да го разоткријат јазот меѓу неговата личност како што се претставуваше во јавноста и она што навистина се случувало зад сцената. Тој навистина спиел на вреќеста фотелја, но имал пристап и до авионите што ги изнајмила неговата компанија и до пентхаус вреден 30 милиони долари што го поседувал во ексклузивното одморалиште на Бахамите.
Банкмен-Фрид треба да се соочи со судење на 2 октомври поради обвиненијата дека злоупотребил милијарди долари oд депозитите на клиенти. Федералните обвинители го товарат дека се препуштил на луксуз купен со украдени пари. Тој рече дека не извршил измама и дека парите што недостигаат биле грешка.
„Блумберг“ дојде до низа фотографии направени во последната година пред да банкротираат компаниите на Банкмен-Фрид, FTX и „Аламеда“ (Alameda Research). Тие овозможуваат интимен поглед во животот на Банкмен-Фрид, кој одби да ги коментира, и на неговиот потесен круг на врвот од нивната декаденција - организирање забави, дружби со милијардери и политички фигури. Фотографиите ги доловуваат и задоволствата на повлечениот математичар што стана криптокрал.
БОЖИЌНА ЗАБАВА: Компанијата во 2021 година ја одржа својата празнична забава во изнајмен простор за организација на настани во близината на седиштето во Насау, на Бахамите. FTX имаше намера од прославата да направи годишна традиција и веќе почна да го планира настанот за 2022 година, пред колапсот во ноември.
КАНЦЕЛАРИЈА: Таткото на Банкмен-Фрид, Џо Банкмен, е познат експерт за даночно право и професор на универзитетот „Стенфорд“. Банкмен исто така работел со скратено работно време во FTX, нудејќи даночни совети за вработените и помагајќи при регрутирање, покажуваат судските поднесоци. По работата, неговиот син редовно спиел на нешто што изгледа како џиновски кучешки кревет, понекогаш придружуван од канцеларискиот миленик Гофер.
РАБОТНАТА МАСА НА ДИРЕКТОРОТ: Банкмен-Фрид минувал многу време во канцеларија, а неговиот работен простор не бил многу уреден. Меѓу предметите на неговата работна маса има кутија „емсам“, кој се добива на рецепт и се користи за лекување депресија и Паркинсонова болест. Банкмен-Фрид претходно ја опиша својата употреба на лекот за депресија во интервју за „Блумберг бизнисвик“. Тој исто така имал личен соларник, бидејќи често сакал да ја пресолува храната.
ПРИВАТЕН АВИОН: Во 2022 година, Банкмен-Фрид често патувал со приватен авион меѓу Бахамите, Њујорк и Вашингтон. Меѓу неговите омилени закуски, очигледен е изборот на пакување со пуканки од брендот „Лесер ивл“ (Lesser Evil). Имал и уникатни дуксери со својата силуета на грбот.
ПОЗНАТИ ЛИЧНОСТИ: Голем дел од тоа како Банкмен-Фрид толку брзо го зацврсти својот кредибилитет отпаѓа на неговиот пристап до истакнати политички и деловни фигури. Тој вечераше со градоначалникот на Њујорк, Ерик Адамс, некогаш гласен поддржувач на криптовалутите, кој ја зеде својата прва градоначалничка плата во биткоин и етереум, и се дружеше со Џон Колисон од „Страјп“ (Stripe Inc.), претседателот и коосновач на вториот по вредност технолошки стартап во Америка.
ПЕНТХАУС: „Орхидејата“ (The Orchid) е луксузна зграда во елитната населба Албани во Насау. Банкмен-Фрид живеел во пентхаусот со своите колеги и блиски пријатели. Станарите се забавувале на различни начини.
ВИЛА: Друга локација во Албани служела како второ место за забава на тимот и дом на Констанс Ванг, поранешна оперативна шефица во FTX. Компанијата исто така ја поседувала оваа вила, која се протега на два ката и се нарекувала Конч шек, според стечајните документи.
ЗАБАВИ: Вработените во FTX на Бахамите не се релаксирале на вообичаени начини. Банкмен-Фрид играл брз шах со својот персонал и играл падел, спорт со рекет што е мешавина помеѓу тенис и сквош. Тој го прослави својот роденден во 2022 година со локални жители од Бахамите што се занимавале со помошни канцелариски работи, како чистење и угостителство.
Прочитајте повеќе: Зошто сите сакаат да играат падел?
ВНАТРЕШНИОТ КРУГ: Клучната група на вработени минувала многу време заедно, од вечери до играње. Некои од луѓето ќе се свртат против Банкмен-Фрид како сведоци соработници што се изјаснија за виновни за она за што се товарат.
.webp){kind=icon}
