Банкмен-Фрид е оставен на „леб и вода“ и без лекови, велат адвокатите

Барањата на Сем Банкмен-Фрид за вегански оброци и пристап до лекови во затворот не се сослушани, велат неговите адвокати, додавајќи дека бараат и подобар пристап до нивниот клиент за да ја подготват својата одбрана.

Во борбата за повеќе време пред неговото судење за измама во октомври, адвокатите посочија дека 31-годишниот криптомагнат „буквално преживувал од леб и вода“ и малку путер од кикиритки. Тие ги изнесоа своите аргументи додека Банкмен-Фрид беше во федералниот суд на Менхетн во вторникот за да се изјасни за невин по точките на потесното обвинение.

Тоа беше негово прво појавување на суд откако му беше укината кауцијата, кога судија одлучи дека можеби се обидел да измами двајца сведоци. Обвиненијата против Банкмен-Фрид беа намалени за речиси половина, за од случаите да се исклучат точки што не се вклучени во договорот за екстрадиција со Бахамите минатата година.

Подготовка на одбраната

Адвокатот на Банкмен-Фрид, Марк Коен, рече дека на неговиот клиент не му бил даван „aдерал“ (adderall) откако е во затвор и дека му останале само неколку дози од друг лек на рецепт, антидепресивот „емсам“.

Адвокатите се пожалија бидејќи се мачат да ја подготват одбраната без да им биде овозможен пристап до самиот Банкмен-Фрид. Во 11-те дена додека беше во федерален притвор, на нивниот клиент не му било дозволено да прегледа ниту една од милионите страници докази, рече адвокатот Кристијан Евердел, нарекувајќи го тоа прекршување на правото на бранител од шестиот амандман.

Bloomberg

Евердел рече дека на неговиот тим му бил претставен план Банкмен-Фрид да ги прегледува доказите со неговите адвокати два дена во неделата, од 9 до 15 часот, користејќи лаптоп од ќелија во зградата на судот, што тој го смета за несоодветно.

„Тоа значи дека не може да помогне во подготовката на одбраната“, изјави Евердел.

Банкмен-Фрид ја обжали одлуката за кауција, но моментално се наоѓа во притворското одделение Метрополитен во Њујорк. Пред да му биде укината кауцијата од 250 милиони долари, тој живееше во домот на неговите родители во Калифорнија.

Најсериозни обвиненија

Банкмен-Фрид се изјасни за виновен по седум точки од обвинението за измама и перење пари, содржани во ревидираното американско обвинение поднесено на 14 август. Точките по кои ќе му се суди годинава се најсериозните со кои се соочува. Обвинителите велат дека наводната шема за измама ги чинела корисниците и инвеститорите милијарди долари.

Банкмен-Фрид ја оспори валидноста на пет од 13 точки од претходното обвинение, тврдејќи дека тие не биле дел од договорот за екстрадиција според кој тој беше вратен во САД во декември. Владата ги отфрли овие пет обвиненија од судењето и се откажа од шестото.

Bloomberg

Поранешниот шеф на FTX, кој ја водеше својата криптоимперија од гореспоменатата островска држава, е обвинет за оркестрирање на долготрајна измама во FTX и трговската компанија „Аламеда рисрч“ (Alameda Research), кои пропаднаа во ноември. Неговото судење е закажано за 2 октомври.