Керолин Елисон, поранешната извршна директорка на „Аламеда рисрч“ (Alameda Research) и поранешна девојка на Сем Банкмен-Фрид, брзо стана центар на вниманието во судењето за измама на основачот на FTX во Њујорк.
Обвинителите рекоа дека Банкмен-Фрид нејзе и на неговите најблиски пријатели им ја кажал вистината за преземање средства од клиентите, иако „го лажел светот“ за безбедноста на неговата криптоплатформа. Во меѓувреме, адвокатите на одбраната рекоа дека Банкмен-Фрид се потпирал на Елисон да ја води „Аламеда“, а кога побарал од неа да ја заштити фирмата поради несигурноста на пазарот минатата година, таа не го сторила тоа.
Воведните изјави од вторникот ја навестија стратегијата што двете страни ќе ја користат за да ја поколебаат поротата во ова историско судење, вклучувајќи го и насочувањето кон вмешаноста на блиските на луѓе на Банкмен-Фрид во колапсот на FTX. Се очекува Елисон да сведочи како главен сведок на Владата, откако таа постигна договор за соработка заедно со уште двајца извршни директори.
Нејтан Рен, помошник-обвинител, на првиот ден од судењето за измама го прикажа Банкмен-Фрид (31) како пресметлив криминалец, кој користел депозити на инвеститори во FTX како лична банкарска сметка пред да пропадне компанијата пред една година. Тој извлекувал пари од FTX за да ги покрие своите заеми, поднесувал лажни финансиски извештаи и лажно сведочел пред Конгресот дека FTX не користи пари на клиентите.
„Вистината се крие во „тајната што ја споделил само со неколку члена од неговиот поблизок круг, неговата девојка и некои од неговите најблиски пријатели“, рече Рен.
Случајот, означен од американската влада како еден од најголемите финансиски криминали во историјата на земјата, ќе истражува како Банкмен-Фрид, чуден тип од Калифорнија, дошол до тоа да води и наводно да уништи една од најголемите криптоберзи во светот. Дипломецот на Технолошкиот институт во Масачусетс (МИТ) се соочува со максимална затворска казна од 20 години за секое од петте најтешки обвиненија против него.
„Аламеда“ одигра клучна улога во колапсот на FTX. Обвинителите велат дека Банкмен-Фрид дозволил „Аламеда“ да позајмува неограничени износи од FTX и да ги користи за тргување и други активности, вклучувајќи и политички донации. FTX стана познат и плаќаше познати личности како Том Брејди и Стеф Кари да се појават во неговите реклами. Таткото на Сем, Џозеф Банкмен, се појави во сега озлогласената реклама за Супербоул со Лери Дејвид.
FTX банкротира минатиот ноември
Bloomberg
Банкмен-Фрид „имаше богатство, имаше моќ, имаше влијание, но сето тоа беше изградено на лаги“, изјави Рен пред поротниците. „Тој изврши огромна измама и зеде милијарди долари од илјадници жртви“.
Лицето на Банкмен-Фрид остана ладно додека зборуваше Рен, но накратко погледна во поротата кога обвинителот ги нагласи „милијардите“ стекнати со измама, пред да го насочи вниманието кон својот лаптоп. Родителите на поранешниот извршен директор на криптоберзата, инаку професори по право на универзитетот „Стенфорд“, седеа во галеријата зад својот син.
Кога дојде нивниот ред, адвокатите на Банкмен-Фрид ја обвинија „Аламеда“ за страшниот недостиг од средства на клиентите. Адвокатот Марк Коен рече дека во месеците пред поднесувањето на стечајот од страна на FTX во ноември, неговиот клиент станал загрижен за драматичните флуктуации на цените на криптото и ја повика Елисон да ја заштити изложеноста на дополнителни загуби, но таа не го сторила тоа.
„Сем постапи со добра волја и презеде разумни деловни мерки“, рече Коен, додавајќи дека неговиот клиент „верувал дека имаат доволно средства за да ја пребродат бурата“.
Од сјај до очај
Коен изјави дека „подемот и падот“ на FTX ја отсликуваат пошироката криптоиндустрија, која во 2022 година беше погодена од брзото менување на пазарните услови.
„Случајот на многу начини е поврзан со случувањата во криптосекторот од 2017 до 2022 година“, рече Коен. „Ќе видите дека крипто не е за секого“, нагласи адвокатот и додаде дека „не е криминал да се води компанија што ќе се најде во ситуација да мора да помине низ бура“.
Тој додаде и дека превирањата во индустријата дополнително се зголемиле кога шефот на „Бајненс“ (Binance), главниот конкурент, објавил твит во кој го напаѓа FTX, што предизвикало јуриш кај депозитите на компанијата.
Чанпенг Жао, коосновач и извршен директор на „Бајненс“
Bloomberg
„Соочен со криза со ликвидноста, Сем не побегна и се обиде да ја стабилизира компанијата и да ги врати средствата на клиентите“, рече Коен.
Банкмен-Фрид е обвинет дека земал средства од клиентите на FTX и ги користел за шпекулативно тргување преку „Аламеда“. Коен посочи дека клиентот „имал разумна основа да верува“ дека заемите што ги бара „Аламеда“ се одобрени и обезбедени со колатерал.
Покрај Елисон, се очекува и неколку директори на FTX да сведочат против нивниот поранешен шеф. Гери Ванг, поранешен шеф за технологија на FTX, и Нишад Синг, поранешен директор за инженерство на FTX, исто така се очекува да заземат став како сведоци соработници откако се изјаснија за виновни по обвиненијата за измама.
Рен истакна дека докази за лажни изјави на Банкмен-Фрид може да се најдат во условите за користење на услугите од компанијата, како и старите твитови што ги уверуваат клиентите дека нивните пари се заштитени.
Рен додаде дека FTX им кажал на клиентите дека парите им припаѓаат ним, а не на компанијата. „Рекламниот слоган на FTX беше за тоа дека клиентите можат да му веруваат“, посочи тој.
Тој се осврна и на твит на Банкмен-Фрид што гласи: „FTX има долга историја на заштита на средствата и продолжува да го прави тоа и денес“.
„Изјавите дека FTX ги чува парите на клиентите безбедни беа лаги“, рече Рен.
Сведоци
Меѓу двајцата владини сведоци во средата беше Адам Једидија, поранешен програмер во FTX и пријател од колеџ на Банкмен-Фрид. Тој живеел на Бахамите во 2021 и 2022 година со уште девет луѓе, вклучувајќи го и Банкмен-Фрид, во пентхаус вреден 35 милиони долари.
Сведокот ја напуштил FTX неделата кога банкротирала, откако дознал дека биле злоупотребени средства на клиентите.
„Како програмер во FTX, можеби несвесно напишав код што придонесе за злосторството“, рече Једидија, кој доби имунитет во замена за сведочење.
.webp){kind=icon}
Во моментов нема коментари за веста. Биди прв да коментира...