Сведочење на Банкмен-Фрид: префрлање на вината, тешки прашања и пцовки

Ко-основачот на FTX, Сем Бaнкмен-Фрид, најверојатно ќе го заврши сведочењето на неговото судење за измама в вторник, давајќи им на американските сојузни обвинители последна шанса да го испрашаат во својство на поранешен криптокрал за спектакуларниот колапс на неговата деловна империја и загубите од милијарди долари на клиентите.

Додека Банкмен-Фрид изгледаше самоуверено и сигурно во своите одговори кога беше испрашуван од одбраната на клупата за сослушување, неговото однесување се промени откако помошничката на американскиот обвинител, Даниеле Сасун ја доби својата шанса во понеделникот. Тој избегна многу од нејзините прашања за време на вкрстено испрашување и на крајот призна дека бил свесен или вклучен во клучните одлуки на криптоберзата FTX.

Случајот против Банкмен-Фрид се фокусира на наводни нелегални трансфери на милијарди во средства од клиентите на FTX до поврзаниот хеџ-фонд „Аламеда рисрч“ (Alameda Research). Владините адвокати ќе имаат уште неколку часа во вторник, третиот ден на Банкмен-Фрид пред поротата во Њујорк, за да се обидат да ги истакнат недоследностите во неговата одбрана.

Банкмен-Фрид е последниот сведок на одбраната, а неговите адвокати ќе го завршат случајот в вторник. Владата може да претстави уште двајца сведоци, вклучувајќи агент на ФБИ и вработен во компанијата „Аполо“, пред случајот да дојде до завршните аргументи и конечно да биде предаден на поротата.

Еве ги главните информации од сведочењето на Банкмен-Фрид во понеделникот:

Префрлање на вината: Тој продолжи да обвинува други, вклучувајќи ја и извршната директорка на „Аламеда“ и негова поранешна девојла, Каролин Елисон, тврдејќи дека не секогаш бил запознаен со деловните прашања. Тој рече дека Елисон понудила да се повлече откако ја поканил на состанок во јуни 2022 година. Истакна и дека бил загрижен поради „историскиот неуспех на 'Аламеда' да се заштити“, како и нејзината изложеност на пазарот. „Бев загрижен што претходно не зборував доволно со неа за хеџингот“, рече тој. „Тоа не беше моја вина. Мојата најголема грижа беше дека 'Аламеда' ќе банкротира ако остане незаштитена“. Сепак, тој рече дека бил свесен за растечките одговорности на „Аламеда“ и дека стои зад важните одлуки за инвестиции и трошење.

Хеџинг: Обвинителите успеаја да зададат неколку удари кон крајот на денот. Банкмен-Фрид рече дека знаел дека „Аламеда“ не го заштитила целосно својот ризик, поткопувајќи го неговото претходно тврдење дека Елисон лошо управувала со задолжувањето на компанијата. За време на неговото сведочење, тој рече дека бил свесен оти компанијата можеби не може да ги врати сите свои долгови. Елисон, која сведочеше претходно во текот на судењето, кажа дека тој е оној кој избрал да ги направи инвестициите што ја ставија „Аламеда“ во долгови.

Ризични инвестиции: Банкмен-Фрид призна дека наредил „Аламеда“ да вложи неколку милијарди долари во ризични инвестиции, вклучително и аквизиција на компанијата за видеоигри „Сторибук брол“ ​(Storybook Brawl), удел во веб-страницата за вести за криптовалути „Блок“ (Block) и пари дадени на „Модуло капитал“ (Modulo Capital). „Мислам дека за неколку милијарди oдлучив јас“, рече тој. Подоцна призна дека ризичните инвестиции на „Аламеда“ биле преголеми, „имајќи предвид дека не се заштитени“.

Директор на одборот: Банкмен-Фрид рече дека тој е единствениот член на одборот за некои ентитети на „Аламеда“, иако немал таква намера. Откритието беше удар по неговата одбранбена стратегија, која се обиде да се дистанцира од „Аламеда“ за време на судењето.

Сигурно: Сасун агресивно го испрашуваше Банкмен-Фрид за неговите обиди да ја увери јавноста дека FTX е безбедна криптоберза, покажувајќи пред поротата твит од август 2021 година во кој изјавува дека „средствата и безбедноста на корисниците се на прво место“. Откако се согласи дека сакал неговите следбеници да мислат оти заштитата на потрошувачите е важна за него, тој беше прашан за разговор со новинар на „Вокс“ (Vox) во кој се чини дека го поткопува сопствениот аргумент. Тој на новинарот му кажува дека неговите изјави за желбата за регулација се „само ПР“. „Насамо сте кажале и работи како 'еб*ти регулаторите'?“, праша Сасун. „Eднаш го кажав тоа“, одговори Банкмен-Фирд.

Изглед: Во обид да го прикаже Банкмен-Фрид како некој кој бил свесен за неговиот разбушавен изглед, Сасун се фокусираше на неговото претходно сведочење дека неговиот впечатлив изглед на косата настанал затоа што „бил малку зафатен“ и не се потрудил да ја скрати косата долг временски период. На Банкмен-Фрид му беше претставена статија на „Њујорк Тајмс“ во која е цитиран како вели дека „важно е луѓето да мислат дека изгледам лудо“. Банкмен-Фрид призна дека „можеби кажал делови од тоа“. Сасун, исто така, се обиде да го поткопа неговото сведочење за носење маица и шорцеви бидејќи му било удобно да го прави тоа, прашувајќи го дали му рекол на Ентони Скарамучи дека тоа е „дел од неговиот бренд“ кога инвеститорот на FTX го замолил да носи вратоврска во одредени прилики. „Не се сеќавам дека сум го кажал тоа“, рече тој. „Можеби сум го кажал“.

Извинување: Банкмен-Фрид започна славна медиумска турнеја по колапсот на FTX. Тој пред поротата изјави дека разговарал со новинарите откако поднел оставка од функцијата извршен директор затоа што тоа било „вистинската работа“ за него и затоа што „сакал да се извини за она што се случило“. Сепак, Банкмен-Фрид постојано сведочеше дека не може да се сети на работи што ги цитирал во написи или интервјуа. Ова го поттикна американскиот окружен судија Луис Каплан да интервенира и во еден момент да праша: „Господине, дали се сеќавате дека ги кажавте тие зборови или го кажавте тоа во суштина?“.

Во моментов нема коментари за веста. Биди прв да коментира...

Остави коментар