Новата истрага за FTX треба да биде ограничена и брза, вели судијата

Американски федерален судија одлучи да ги ограничи трошоците и времетраењето на новата надворешна истрага за криптофирмата FTX Trading, која е погодена од измами, велејќи дека случајот за несолвентност на компанијата не треба да се оптоварува со уште една мултимилионска истрага.

Американскиот стечаен судија Џон Дорси застана на страната на адвокатите на FTX и неговите доверители, кои тврдеа дека новата истрага нарачана од апелацискиот суд треба да биде кратка и ограничена во обем. На почетокот на овој месец федералниот апелациски суд во Филаделфија нареди назначување истражител за случајот во рамките на Поглавје 11, но деталите за каква било истрага му ги остави на Дорси.

Канцеларијата на американскиот управник, федералното тело што ги надгледува корпоративните стечаи, тврди дека трошоците, времетраењето и опсегот на новата истрага треба да се остават отворени во очекување на назначувањето истражител. Дорси изјави дека тоа е рецепт за неконтролирано трошење што нема да донесе ништо ново.

„Ако прашањето се остави на отворен процес, тоа може да значи десетици милиони долари“, рече Дорси за време на судското сослушување во Вилмингтон, Делавер. „Во следните недели, адвокатите на компанијата, нејзините доверители и управникот треба да работат заедно на формален предлог за назначување истражител“, рече Дорси.

FTX пропадна во 2022 година, по наводите дека злоупотребилa дигитални средства што клиентите ги оставиле на нејзината платформа за криптотргување. На крајот, основачот на компанијата, Сем Бенкмен-Фрид, поднесе оставка и подоцна беше осуден за организирање голема измама.

Откако советниците за реструктурирање го презедоа FTX во 2022 година и ја ставија фирмата во банкрот, компанијата и нејзините доверители го истражуваат нејзиниот пад додека трагаат по милијарди долари во готовина и дигитални средства. Во следните неколку месеци компанијата ќе побара од доверителите да гласаат за планот за распределба на парите што ги собрала.

Дорси рече дека истражителот треба да прегледа различни истраги за FTX од страна на професионалците за реструктурирање на компанијата, како и сите надворешни истраги од регулаторите и обвинителите. Тој исто така кажа дека истражителот треба да ги разгледа сите можни конфликти на интереси што ги вклучуваат адвокатите на FTX. „Целиот процес не треба да трае повеќе од 45 дена и треба да заврши со извештај на истражителот, кој ќе ги сумира истрагите“, додаде тој.

Во моментов нема коментари за веста. Биди прв да коментира...

Остави коментар