Поради пониската награда за копање биткоин, рударите се вртат кон нови технологии

На секои десет минути се додаваат нови блокови на трансакции во блокчејнот на биткоинот. За да ги поттикне рударите да ја поддржат и обезбедат мрежата, биткоинот ги наградува оние што успешно додаваат блокови на трансакции во блокчејнот со награда за блок (англ. block reward).

Сепак, износот на таа награда не е фиксен, бидејќи се намалува со текот на времето во повторливиот настан познат како преполовување на биткоинот. Преполовувањето е процес во кој наградата за блок се намалува на половина, што значи дека рударите добиваат половина од биткоините за секој нов блок што го додаваат во блокчејнот. Првично, наградата за блок беше 50 биткоини. По првото преполовување во 2012 година, наградата беше преполовена на 25 биткоини. Потоа следуваше второ преполовување во 2016 година, намалувајќи ја наградата на 12,5 биткоини по блок.

Токму месецов, на 19 април, тивко го одбележивме намалувањето на наградата за ископување биткоини, од 6,25 биткоини на 3,125. Преполовувањето продолжува да се случува приближно на секои четири години, додека не се создадат сите потенцијални 21 милион биткоини преку блок награди.

Во текот на изминатата недела аналитичарите на биткоинот известија за хаш-цената, важен дневен индикатор што ги одразува очекуваните приходи во терахаши во секунда (THs⁻¹) или петахаши во секунда (PHs⁻¹). Во суштина, цената на хашот ја претставува дневната заработка што би можеле да ја направат рударските уреди ASIC за секој терахаш на компјутерска моќ што ја користат на биткоин-мрежата.

Нова генерација на уреди

Денешните водечки модели на пазарот ги вклучуваат неодамна лансираните апаратури за ископување биткоин, како што се С21 (S21) на „Битмејн“ (Bitmain) и С21 Про (S21 Pro) со воздушно ладење. Понатаму, моделите М63С (M63S), М66С (M66S) и М60С (M60S) на „Микробити“ (Microbt) се рангирани меѓу првите пет уреди за рударење биткоин според дневниот приход од 26 април 2024 година. Деталните технички податоци откриваат дека уредите со воздушно ладење AT2880 на „Аурадајн“ (Auradine) и еднофазните уреди за потопување АИ3680 (AI3680), исто така, остануваат профитабилни со сегашната вредност на хаш-цената.

Оние понови модели со T21 на „Битмејн“ и M60 на „Микробити“ покажуваат значителна профитабилност дури и со цена на електрична енергија од 0,12 долари за киловат-час (kWh). Од друга страна, пресметките на профитабилноста покажуваат дека постарите модели, како Ентмајнер С9 (Antminer S9), со 14 THs⁻¹ и цена на електрична енергија од 0,04 долари за kWh, би работеле со загуба, со дневен дефицит до 2,53 долари. Затоа, јавно котираните рударски компании и големите флоти што управуваат со рударите самостојно или преку хостинг значително ги користат новите машини и ги намалуваат оперативните трошоци.

За разлика од поновите ASIC од „Битмејн“ и „Микробити“, постарите модели моментално се достапни по намалени цени, истакнуваат од „Луксор технолоџис“ (Luxor Technologies). Поточно, од септември 2023 година цените за моделите Битмејн ентмајнер С19j про (Bitmain Antminer S19j Pro) и Микробити M30С+ (Microbt M30S+) се намалија за 28 проценти и 35 проценти, соодветно. Додека пејзажот за ископување биткоин се менува, профитабилноста продолжува да се приклонува кон поновите модели ASIC, кои ги надминуваат своите претходници.

Со напредната технологија, која нуди подобрена ефикасност и повисоки хашрејти, овие уреди станаа клучни за одржување конкурентни приходи. И покрај претходните очекувања за значителен пад на ексахаши во секунда (EHs⁻¹) од мрежата, најновите податоци собрани од страницата „Хаш рејт индекс“ покажуваат дека стапката на хаш сè уште е исклучително висока, достигнувајќи 640 EHs⁻¹. Досега пониската цена на хашот не резултираше со значително губење на хашрејт од мрежата на биткоинот.