.webp){kind=icon}
Класификацијата на биткоинот како дел од т.н. Трамп трејд (Trump trade) почнува да се намалува со пошироките поместувања на глобалните пазари, кои делумно ѝ се припишуваат на можноста за враќање на поранешниот претседател во Белата куќа.
Приносите на обврзниците и доларот скокнаа во последно време поради водството на републиканскиот кандидат Доналд Трамп пред потпретседателката Камала Харис на пазарите за предвидување. Во едно гледиште инвеститорите ги ограничуваат облозите за полабава монетарна политика бидејќи Трамп ќе примени агенда за раст на веќе робусната американска економија ако победи на 5 ноември.
Биткоинот и акциите се поколебаа заедно со ова релативно затегнување на финансиските услови, оставајќи го токенот да се соочи со својата прва неделна загуба во последните три. Трамп ја прифати индустријата за дигитални средства за време на неговата кампања, подигнувајќи го расположението за крипто, но се поставува прашањето дали влијанието на неговите пошироки приоритети може да го намали таквиот оптимизам.
„Апсолутно да, распродажбата на акциите, повисокиот американски долар и повисоките приноси се еднакви на затегнување на финансиските услови“, рече Тони Сајкамор, пазарен аналитичар во „ИГ Австралија“ (IG Australia Pty). „Тоа не е добро за криптото на остриот крај на спектарот“.
Биткоинот напредуваше за околу 1 отсто, до 67.300 долари, заклучно со 6.30 часот наутро во четвртокот во Лондон, намалувајќи го својот неделен пад на приближно 2 отсто. Најголемото дигитално средство порасна за околу 60 отсто годинава и достигна рекордно високо ниво од 73.798 долари во март, поткрепено од побарувачката за американски спот-биткоин фондови со кои се тргува на берза.
Трамп вети дека ќе ги направи САД криптопрестолнина на планетата додека се бори за гласови со демократската кандидатка Харис, која усвои поодмерен пристап со ветување дека ќе поддржи регулаторна рамка за индустријата. Нивните позиции се во контраст со репресијата врз секторот за време на претседателот Џо Бајден.
Кандидатите се статистички изедначени меѓу гласачите во секоја од седумте американски клучни држави во анкетата на „Блумберг њуз“ (Bloomberg News) и „Морнинг консалт“ (Morning Consult). Тенката разлика на овие боишта нагласува дека дури и последниот блок на реклами, митинзи и кампањи „од врата на врата“ би можел да одлучи кој ќе се смести во Белата куќа.
Ако Трамп излезе како победник, тоа може да доведе до повисоки приноси и на крајот „негативно да влијание за ризичните средства“, рече Каролин Маурон, соосновачка на „Орбит маркетс“ (Orbit Markets). Но „очекуваното регулаторно омекнување на администрацијата на Трамп кон криптоиндустријата сепак треба да биде поважниот фактор“, додаде таа.
